Аужырэ уахътэм социальнэ хъытыухэм тищыIэныгъэ чIыпIэшхо щаубыты хъугъэ. Лъэхъаным къыздихьыгъэ Iэрыфэгъу щыIакIэм ахэр изы Iахьых.

Ар къыбгурыIонэуи щыт — сыд фэдэ чIыпIэ ущыIэми, телефоныр зыдэпIыгъ, Интернетыр къеубыты къодыемэ, дунаим щыхъурэ-щышIэрэм урыгъозэн плъэ­кIыщт.

Ныбжьым, шIогъэшIэгъоным, зыгъэгумэкIырэм ялъытыгъэу шъхьадж зэрыгъозэн ылъэкIыщт нэкIубгъохэр къыхехых. Республикэ гъэзетэу «Адыгэ макъэм» еджэ зышIоигъохэу, лъэпкъыбзэкIэ тхыгъэу къыдэкIырэ къэбар­лъыгъэIэс амал закъор тхьапэм тетэу къыз­IэкIэзыгъэхьанэу фаехэм ар къа­дэхъуным пае мары илъэси 100 хъущт цIыф жъугъэхэм залъыIэсырэр. Ау уахъ­тэм тыдэбакъо ыкIи аужырэ шапхъэхэр тэгъэфедэх. Социальнэ хъытыухэу Одно­классники, ВКонтакте зыфиIохэрэм, Телеграм-каналым республикэм къэ- ба­рэу илъыр нахьыбэм урысыбзэкIэ, нахь цIыфыбэ еджэшъуным фэшI, къарыдгъахьэщтыгъ. Джы Телеграм-каналыкIэ непэ къыщыублагъэу тиIэщт. ЦIэу фэтшIыгъэр — «Хэкум ымакъ». Ащ адыгабзэкIэ ыкIи тыркубзэкIэ (тилъэпкъэгъухэм янахьыбэр Тыркуем зэрэщы­псэурэм фэшI) къэбархэр къихьащтых. ШъунаIэ тешъудз, тигъэзет нэ­кIубгъохэм къарымыхьэгъэ къэбархэри ащ щы­жъугъотынхэ шъулъэкIыщт, видеотехыгъэхэри итыщтых.

Гъэзетэу «Адыгэ макъэр» къызIэ­кIэхьэрэ пстэуми тинэкIубгъохэр псын­кIэу къагъотышъущтых — апэрэ нэ­кIубгъом тисоциальнэ хъытыухэм ыкIи Телеграмым уарызыщэщт QR-кодхэр джы тетых, телефон камерэр атеб­гъэпсыхьэмэ, къиныгъо къыпымыкIэу уарыхьан плъэкIыщт. Шапхъэу пылъхэм ащыщ арыхьэ зышIоигъом социаль- нэ нэкIубгъо ежьми иIэныр. Ащ Iофыр нахь къыгъэпсынкIэщт.

ТинэкIубгъохэр шъушIогъэшIэгъонынхэм, ахэм къарыхьэрэр къышъуфэфедэным тэ тишъыпкъэу тыдэлэжьэщт ыкIи шъори IэпыIэгъу ащкIэ шъукъытфэхъун шъулъэкIыщт — шъуирайон, шъуипсэупIэ щыхъурэ-щышIэрэм афэгъэхьыгъэ къэбархэр, видеотехыгъэхэр къытфэжъу­гъэхьыхэмэ, тигуапэу къарыдгъэхьащт, IэкIыбым щыпсэурэ тилъэпкъэгъухэми ар ашIогъэшIэгъонынэу тэгугъэ.

ШъуакIатх тисоциальнэ нэкIубгъохэм, ти «Телеграм», сыд фэдэ Iофыгъо паекIи ренэу тызэIухыгъ, тигуапэу Iоф къыжъудэтшIэщт!

МэщлIэкъо Саид.