Урысыем и УIэшыгъэ КIуачIэхэм къулыкъур ащызыхьыщт ныбжьыкIэхэм ябжыхьэ дзэ дэ­щыгъо шэкIогъум и 1-м рагъэжьагъ, чIыпIэ чыжьэхэм къарыкIыхэрэр зыщаугъоихэу охътэ гъэнэфагъэрэ зыдэсыхэрэм тыщыIагъ, япсэукIэ зэдгъэшIагъ.

Мы илъэсым дзэ дэщыгъор мазэкIэ ыуж къинэнэу хъугъэ. Владимир Путиным иунашъокIэ «частичнэ мобилизациер» зыщыкIорэ лъэ­хъаным дзэ комиссариатхэм яIофшIэн къямыхьы­лъэкIыным фэшI дзэ дэщын кампаниер мазэкIэ зэкIахьагъ.

Мобилизацием къыдыхэлъы­тэгъэ Iофтхьэбзэ шъхьаIэхэр зэшIуахыгъэх, джы дзэ къулыкъум епхыгъэ IофшIэныр зыпкъ итэу зэрэрагъэкIокIырэм зы­щыдгъэгъозэнэу къулыкъур зы­хьыщтхэр зыщаугъоирэ пунктэу АР-м идзэ комиссариат иIэм тыгъуасэ тыщыIагъ. Гъогу те­хьащт ныбжьыкIэхэм ащыщхэм гущыIэгъу тафэхъугъ, зыщау­гъоихэрэ пунктым щыIэкIэ-псэу­кIэу щыряIэр зэдгъэлъэгъугъ ыкIи ежьхэм яшIошIхэр къяд­гъэIотагъэх.

АР-м идзэ комиссариат дзэ къулыкъум ащэщтхэр зыщау­гъоирэ ипункт ипащэу Валерий Николаевым къызэриIуагъэмкIэ, республикэм имуниципальнэ образованиехэм ядзэ комиссариатхэм къаращырэ ныбжьыкIэхэр мы чIыпIэм щаугъоих.

— Адыгеим икIынышъ, дзэ къулыкъур зыхьыщтхэр зэкIэ мыщ къыращалIэх, — къеIуатэ ащ. — Къызэрэсыгъэхэм тетэу температурэр ашы, коронавирусыр яIэмэ экспресс-уплъэ­кIуныр афашIы, дактилоскопическэ регистрациер ыкIи япсихологие изытет епхыгъэ тес­ти­рованиер арагъэкIух.

Мы пунктым дэсыфэхэ дзэ частэу N 13714-м ащэхэзэ ма­фэм щэ агъашхэх. Шапхъэхэм къызэрэдалъытэрэмкIэ, къулыкъушIэ пэпчъ уахътэм елъытыгъэу шъуашэкIэ зэтырагъэпсы­хьэх, чIэгъчIэлъхэр, мэзэ 12-м къыкIоцI зызэратхьакIыщт пкъы­гъохэр зыдэлъ Iалъмэкъхэр, нэмыкIхэри аратых.

— Мы уахътэм ехъулIэу рес­публикэ дзэ комиссариатым зыщаугъоихэрэ ипункт къулыкъум ащэщт нэбгырэ 36-рэ дэс, — къеIуатэ Валерий Николаевым. — Мыхэр командищэу зэтеутыгъэх: зыхэр — Лъэпкъ гвардием идзэхэм, адритIур УФ-м зыкъэухъумэжьынымкIэ и Министерствэ идзэ частьхэм ащэщтых. Тыгъуасэ зичэзыу къэсыгъэ купыр гъогу техьагъ. АР-м идзэ комиссариат зыщаугъоихэрэ пунктэу хэтыр журналистхэм къэтплъыхьагъ. Апэ тызэрыхьагъэр кIалэхэр зыщычъыехэрэ унэр ары. Мыщ къэбзэрымэр къиоу зэIухыгъ, зы пкъыгъо лые тыди теплъэгъощтэп, зы шапхъэм тетэу шъхьантэхэр гъэтIылъыгъэх. Мы унэм къыгот пчъэм тызехьэм, дзэ комиссариатым профес­сиональнэ къыхэхынымкIэ иIофышIэу Наталья Рачек ныб­жьыкIэхэм тестированиер аригъэшIызэ тыIукIагъ.

— «Прогноз» зыфаIорэ методикэмкIэ уплъэкIуныр сэшIы, — еIо ащ. — Мыщ ишIуа­гъэкIэ къулыкъум ащэщтым инервнэ-психическэ зыпкъитыныгъэ къыхэдгъэщын тэлъэкIы.

Дактилоскопическэ уплъэ­кIуныр зэрэзэхэщагъэр къытфиIотагъ ыкIи нэрылъэгъу къыт­фишIыгъ дзэ комиссариатым иотделение ипащэ иIэпыIэгъоу Валерий Панаценкэм. Нэужым дзэ къулыкъум ащэщтхэм ащыщхэм гущыIэгъу та­фэхъугъ.

Артем Круць, илъэс 22-рэ ыныбжь, Красногвардейскэ районым къикIыгъ:

— Мыщ дэс кIалэхэм ты­гъуаси, непи къэкIуагъэхэр ахэтых. Сэ мэфэ заулэ хъугъэ сызыщыIэр. Арышъ, къэсIон слъэкIыщт дзэ пащэхэр дэгъоу къызэрэддэзекIохэрэр, тищы­кIэгъэщтыр сыд фэдэрэ лъэныкъокIи игъэкIотыгъэу къытфа­Iуатэ, къыдгурагъаIо. Мафэм щэ тагъашхэ, сызэрэщымыгу­гъыгъэу пстэури къычIэкIыгъ. Ары пакIошъ, о узыфэе стырыпсыр къыхэпхын амал щыI, ау нэмыкI чIыпIэу тыздащэщтым зэрэщытыщтыр сшIэрэп.

Артем къызэриIуагъэмкIэ, дзэкIолI шъыпкъэ зэрэхъугъэр джыри икъоу зэхишIагъэп. Ау пытэу ицыхьэ зытелъэу къы­хигъэщыгъэр зэрифэшъуашэу къулыкъур къыхьынышъ, амал зэриIэкIэ ихэгъэгу къыухъу­мэнышъ къызэригъэзэжьыщтыр ары.

Мыекъуапэ щыщ Артур Кашукчанян мы уахътэм зыдэщыIэ чIыпIэр ыгу зэрэрихьырэр, къэбзэныгъэу, рэхьатныгъэу чIэлъыр шапхъэхэм адиштэу зэрэщытыр къыхигъэщыгъэх. Сыд фэдэрэ лъэныкъокIи дао имыIэу къыIуагъ.

— Мыекъопэ индустриальнэ техникумыр псэолъэшIын Iоф­хэмкIэ къызысэухым, — къе­Iуатэ кIэлэ ныбжьыкIэм, — Родинэм ыпашъхьэ пшъэрылъэу щысиIэр згъэцакIэмэ сшIоигъоу дзэ къулыкъум сыкIонэу ис­хъухьагъ.

Шъугу къэдгъэкIыжьын, мыгъэрэ бжыхьэ дзэ дэщыгъом унашъоу щыIэмкIэ Адыгеим щыщ ныбжьыкIэ 400 фэдизмэ къулыкъур ахьыщт. Республикэ дзэ комиссариатым дзэм дэщыгъэнхэмкIэ ыкIи ухьазырыгъэнхэмкIэ отделым ипащэу Виталий Лебедевым къызэри­IуагъэмкIэ, дащын фэе пчъа­гъэм щыщэу нэбгыри 150-рэ фэдизыр къулыкъум кIогъахэх.

Iэшъынэ Сусан.