Проектэу «Билет в будущее» зыфиIорэм къыдыхэлъытагъэу республикэм Iофтхьэбзэ зэфэшъхьафхэр щызэхащэх. Я 6 — 9-рэ классхэм арыс кIэлэеджакIохэм апае зэ­ха­­гъэу­цогъэ программэр Федеральнэ операторхэм аштагъ.

Андырхъое Хъусен ыцIэ зыхьырэ кIэлэегъэджэ колледжым Iоф щызышIэрэ Е. Герцовам кIэлэегъэджэ сэнэхьатым шъэфэу хэлъхэр Мыекъопэ гимназиеу N 5-м икIэлэеджакIохэм къафиIотагъ.

«Билет в будущее» зыфиIорэ проектым ишIуагъэкIэ кIэлэегъэджэ сэнэхьатым ныбжьыкIэхэр нахь фэща-гъэ зэрэхъухэрэр ыкIи ащ къыхэкIыкIэ мы сэнэхьатым зыфэзыгъазэхэрэр нахьыбэ хъунхэу зэрэгугъэхэрэр кIэлэ­егъэджэ-навигаторэу Мыекъопэ гимназиеу N 5-м щылэжьэрэ Мэрэтыкъо А. къыIуагъ.

Я 8-рэ классым щеджэрэ Аринэ кIэлэегъэджэ сэнэхьатыр шIогъэшIэгъон. Ар къыхэзыхыхэрэр лъэныкъо зэфэшъхьафхэмкIэ Iушэу щытынхэ фаеу елъытэ.

Гурыт еджапIэу N 2-м щеджэхэрэр бэмышIэу «Дизайнер одежды» зыIорэ егъэджэным рагъэблэгъагъэх. Мые­къопэ къэралыгъо технологическэ университетым ар щызэхащагъ.

Щыгъын зэфэшъхьафхэр ежь-ежьырэу ашIынхэ амал кIэлэеджакIохэм яIагъ, футболкэхэм аппликациехэр атырагъэуцонхэ алъэкIыгъ.

— Дахэу зыпфэпэныр сыдигъуи ищыкIагъ. Щыгъынхэр зыдырэ, къэзыугупшысырэ специалистхэм джырэкIэ тащэкIэ, — еIо я 8-рэ классым ще­джэрэ Даннэ.

Мыекъопэ гимназиеу N 22-м ия 11-рэ класс щеджэрэ кIэлэеджакIохэм «Фармацевт» сэнэхьатыр зыфэдэм зыщагъэгъозагъ. Iэзэгъу уцхэр пшIэнхэр, препаратыкIэхэр къыдэб­гъэкIынхэр ыкIи ахэр пщэжьынхэр ары пшъэрылъэу фармацевтым иIэр. КIэлэеджакIохэм ар ашIогъэшIэгъоныгъ.

Программэу «Электромонтёр» зыфиIорэм къыдыхэлъытагъэу А. П. Антоновым ыцIэ зыхьырэ гурыт еджапIэу N 23-м щеджэхэрэр мы сэнэхьатым нэIуасэ щыфэхъугъэх Мыекъопэ индустриальнэ техникумым. Инструмент ыкIи Iэмэ-псымэ зэфэшъхьафхэм Iоф адэпшIэным фэшI физикэмкIэ ыкIи хьисапымкIэ шIэныгъэ дэгъухэр уиIэнхэ зэрэфаер ныбжьыкIэхэм къагуры­Iуагъ.

Проектым хэлажьэ зышIоигъохэм сайтэу bvbinfo.ru зыфиIорэм зыщатхын алъэкIыщт.