«ЗекIоныр ыкIи хьэкIэегъэблэгъэным ииндустрие» зыфиIорэ лъэпкъ проектым къыдыхэлъытэгъэ социальнэ заказым фэгъэхьыгъэ федеральнэ хэбзэгъэуцугъэу N 189-м Iоф зэришIэрэр зэрагъэшIэным фэшI зекIонымкIэ программэу ыпкIэ зыхэмылъыр атIуп­щыгъагъ.

А программэр апэрэу зыщагъэцэкIагъэмэ ащыщ Адыгеир. Ащ ыпкъ къикIэу Iоныгъо мазэм къыщегъэжьагъэу шэкIогъум нэс я 5 — 9-рэ классхэм арыс кIэлэеджэкIо 1300-мэ загъэ­псэфын алъэкIыгъ.

Унэгъо Iужъумэ арысхэр ары нахьыбэрэмкIэ тиреспубликэ къыщыхахыгъэхэр. Муниципалитет пэпчъ зэфэдэу сабый пчъагъэу къащыхахыщтыр ащагъэнэфэгъагъ. ЗекIонымкIэ ыкIи курортхэмкIэ АР-м и Комитет къызэрэщыхагъэщыгъэмкIэ, му­ниципальнэ гъэпсыкIэ зиIэ шъолъырибгъури мы Iофтхьа­бзэм хэлэжьагъэх.

Программэм кIэлэцIыкIухэр къэпщэнхэр ыкIи пщэжьынхэр, жъогъуищ категорие зиIэ хьа­кIэщхэм ачIэбгъэсынхэр, бгъэшхэнхэр ыкIи зябгъэплъыхьаныр къыщыдэлъытагъэх.

КIэлэцIыкIу купхэу экскурсие ащэхэрэм зэкIэми кIэлэпIухэр ыкIи гидхэр ягъусагъэх. Анахь чIыпIэ дахэу арагъэлъэгъугъэ­хэм ащыщ поселкэу Хьаджыкъу къыпэIулъ чIыналъэр. Мы социальнэ Iофтхьэбзэ шIагъор апэрэу тихэгъэгу щырагъэкIокIыгъ. Къыхэгъэщы­гъэн фае зекIоным епхыгъэ Iофы­гъохэр къэралыгъом ыпшъэ зэ­рэдэкIыхэрэр, фэIо-фашIэу ащ епхыгъэхэр туроператорхэу ре­естрэм хагъэхьагъэхэм зэрэ­зэшIуахыхэрэр.