Урысые Федерацием и Правительствэ 2022-рэ илъэсым федеральнэ бюджетым къыхагъэкIыщт ахъщэ тедзэхэу гъогухэм яшIын телъытагъэхэр шъолъырхэм атегощагъэ зэрэхъущт шIыкIэр ыухэсыгъ.

Адыгэ Республикэм гъогу хъызмэтым иинфраструктурэ ихэхъоныгъэ пэIуигъэ­хьанэу сомэ миллион 350-рэ джыри ахъщэ тедзэу къыфыхагъэкIыгъ. Мыекъо­пэ районымкIэ Гъозэрыплъэ икIэу Лэгъо-Накъэ нэсыщт автомобиль гъогум ишIын а ахъщэр пэIуагъэхьащт.

Урысые Федерацием и Федеральнэ ЗэIукIэ бюджет ассигнованиехэр атегощэгъэнхэмкIэ и Комиссие игъоу зелъэ­гъум ыуж Урысыем и Правительствэ ахъщэ къафыхэгъэкIыгъэным фэгъэхьыгъэ унашъор ыштагъ, Адыгеим ыцIэкIэ Къэралыгъо Думэм идепутатэу, бюджетымкIэ ыкIи хэбзэIахьхэмкIэ комитетым хэтэу Владислав Резник ащкIэ ишIуагъэ къыгъэкIуагъ.

«Гъозэрыплъэ икIэу Лэгъо-Накъэ нэсыщт гъогум ишIын республикэм игъогу­хэмкIэ анахь проект инхэм зыкIэ ащыщ, Адыгеим зекIонымкIэ иинфраструктурэ хэхъоныгъэ ышIынымкIи ащ мэхьанэшхо иIэу щыт. А гъогум зекIонымкIэ анахь цIэрыIо хъугъэ чIыпIитIур зэрипхыщт. Ащ нэмыкIэу къушъхьэлъэ чIыпIэхэм амалыкIэхэр яIэ хъущтых зекIохэр нахьыбэу къякIолIэнхэмкIэ ыкIи цIыфхэмкIи нахь Iэрыфэгъу хъущт», — къыIуагъ КъумпIыл Мурат.

АР-м и ЛIышъхьэ къызэрэхигъэщыгъэм­кIэ, федеральнэ гупчэм гъусэныгъэ дыриIэу республикэм илъэс къэс инфраструктурнэ проектышхохэр щыпхыращых. ГущыIэм пае, Мыекъуапэ къэзыухьащт автомобиль гъогум ия 3-рэ чэзыу ишIын ухыгъэным, джащ фэдэу автомобиль гъогоу Инэм икIэу БжыхьэкъоякIэм нэсыщтым транспорт зэхэкIыпIэу иIэщтыр ыкIэм нэгъэсыгъэным апае федеральнэ мылъку мы илъэсым къафыхагъэкIыгъ. Ащ нэмыкIэу лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм телъытагъэу гъэхъагъэ хэлъэу гъогухэм ягъэ­цэкIэжьын Адыгеим щызэшIуахы.

«Джырэ уахътэм диштэрэ гъогу инфраструктурэр гъэпсыгъэныр Урысыем и Президентэу Владимир Путиным къыгъэуцугъэ пшъэрылъ шъхьа­Iэхэм зыкIэ ащыщ. Хэгъэгум ишъолъыр­хэм, Адыгеири зэрахэтэу, ясоциальнэ-экономикэ хэхъоныгъэ ащ елъытыгъэу щыт. Республикэм ипащэхэм тырягъусэу, партиеу «Единэ Россием» иIэпыIэгъу хэлъэу гъогухэм яшIын пэIухьащт мылъкум щыщ федеральнэ бюджетым къыхэгъэкIыгъэным тегъэ­псыхьэгъэ IофшIэныр лъыдгъэкIотэщт», — къыIуагъ Владислав Резник.

АР-м и ЛIышъхьэ ипресс-къулыкъу