Адыгэ Республикэм IофшIэнымкIэ ыкIи социальнэ хэ­хъоны­гъэмкIэ и Министерствэ ыштэгъэ социальнэ про­ек­тэу «Унэгъо санаториер» чанэу зыщагъэцакIэхэрэм Шэуджэн районыр ащыщ.

Проектыр зыныбжь хэкIотагъэу зиза-къоу псэухэрэм, сымаджэхэм, сэкъатныгъэ зиIэхэм IэпыIэгъу афэхъугъэным тегъэпсыхьагъ. Ащ фэдэу къуаджэхэмрэ къутырхэмрэ ащыпсэухэрэр нэбгыришъэм ехъух.

Чъэпыогъу мазэм ахэм фэIо-фэшIэ 817-рэ афагъэцэкIагъ. Проектым къыды­хэлъытагъэу сымэджэщым е поликлиникэм мыкIошъущтхэм адэжь къакIох, врач­хэм температурэ е лъыдэкIуае яIэмэ афашы, унэм зэрилъыхэу афашIэн фаехэр къафатхых.

Нэжъ-Iужъхэр бэрэ мэсымаджэх, шIэхэу мэпшъых, яшIэжь къыщэкIэ, бэмэ Альцгеймер узыр къафыкъокIы. Япсауныгъэ нахь дэй зэрэмыхъунэу ахэм афэдэхэр санаториехэм агъакIох, ау зышъхьэ зезымыхьэжьышъухэрэм ящыкIагъэр унэм ащафагъэцакIэ. ФэIо-фашIэхэр зэкIэ ха­бзэм иахъщэкIэ зэшIуахых.