УФ-м хэгъэгу кIоцI къулыкъум иIофышIэ и Мафэ ипэгъокIэу АР-м хэгъэгу кIоцI IофхэмкIэ и Министерствэ кIэлэцIыкIу творче­ствэмкIэ шъолъыр зэнэкъокъоу «Сянэ-сятэхэм полицием Iоф щашIэ» зы­фиIорэм икIэуххэр зэфихьы­сы­жьыгъэх.

Полицием имэхьанэ зыкъегъэIэтыгъэным имызакъоу кIэлэцIыкIухэм мы сэнэхьатым хэшIыкI фыряIэу къэтэджыгъэнхэм Iофтхьабзэр фэIорышIэ. Зэнэкъо­къум хэлажьэхэрэм ясурэт шIыгъэхэмкIэ къыраIотыкIыгъэх полицием иIофшIэн зыфэдэр, къулыкъум ипшъэрылъхэр, нэмыкIхэри.

Мыгъэ зэнэкъокъум илъэси 6-м къыщегъэжьыгъэу илъэс 14-м нэс зыныбжь кIэлэцIыкIухэм яIофшIэгъэ 40 фэдиз къырахьылIагъ. СурэтшIыгъэ анахь дэгъу­хэр осэшIхэм къыхахыгъэх. Ахэм ахэтыгъэх ведомствэм епхыгъэу Iоф зышIэрэ Общественнэ советым илIыкIохэу Светлана Дорошенкэр, Джыгунэ Фатимэ ыкIи Александр Девтеровыр.

Комиссием зэфэхьысыжьэу ышIыгъэхэмкIэ текIоныгъэр афагъэшъошагъ Шъэожъ Заринэ, Огъурлы Мединэ, Баджэ Расулрэ Батыррэ. Ащ нэмыкIэу Министерствэм иследственнэ подразделение загъэпсыгъэр илъэс 60 зэрэхъугъэм епхыгъэу хэушъхьафыкIыгъэ шIухьафтыныр афагъэшъошагъэх Пщыдатэкъо Динэрэ Данэрэ.