Херсон хэкум исыгъэхэу егъэзыгъэ IофкIэ зышъхьэ къезыхьыжьэжьын фаеу хъугъэ нэбгырэ 500 фэдиз Адыгеим къэсыгъ. Республикэм и ЛIышъхьэу КъумпIыл Мурат ахэм япхыгъэу къэуцугъэ Iофыгъохэм ышъхьэкIэ ынаIэ атыригъэтыщт.

МэшIокугъогу вокзалым Мые­къуапэ ахэм щапэгъокIыгъэх Адыгэ Республикэм и ЛIышъхьэ, хабзэм, социальнэ къулыкъухэм ялIыкIохэр, гуфакIохэр. Апэрэ IэпыIэгъур ятыгъэнымкIэ ыкIи зэрысыщтхэр псынкIэу гъэнэфэгъэнхэмкIэ ищыкIэгъэ Iофтхьабзэхэр зехьэгъэнхэ фаеу хъугъэ. Ащ пае цIыфхэр къэмысыхэзэ пIэлъэ гъэнэфагъэкIэ къызщыуцущтхэ чIыпIэ заулэ агъэхьазырыгъагъ. Автобусхэр къагъотынхэмкIэ, хьылъэхэр чIыпIэу зыщыпсэущтхэм анэгъэсыгъэнхэмкIэ гуфакIохэм яшIуагъэ къагъэкIуагъ.

Зышъхьэ къезыхьыжьэжьыгъэхэм язы куп Теуцожь районым кIуагъэ. Ренэу медицинэ IэпыIэгъу зэтыгъэн фаеу щыт цIыфхэр къалэу Мыекъуапэ дэт унэу сэкъатхэр зыщаIыгъхэм ращэлIагъэх. Мыекъуапэ итурбазэхэу «Лань», «Горная» ыкIи «Турист» зыфиIохэрэм къэкощыгъэхэм янахьыбэр ачIагъэтIысхьагъ. Джащ фэдэу пIэлъэ гъэнэфагъэкIэ цIыфхэм псэупIэ ягъэгъотыгъэнымкIэ, социальнэ IофтхьабзэхэмкIэ къулыкъухэм ялIыкIохэр, гуфакIохэр ахэм къапэгъокIыгъэх. Тыдэрэ чIыпIи гуфэбагъэ хэлъэу къащыпэгъо­кIыгъэх, агъэшхагъэх.

Адыгеим и ЛIышъхьэ цIыфхэр къызщыуцугъэ пунктхэр зэкIэ ежь ышъхьэкIэ къыплъыхьагъэх, ыпкIэ хэмылъэу ахэр гъэшхэгъэнхэм, медицинэ ыкIи психологическэ IэпыIэгъу ятыгъэным анаIэ зэратетыр зэригъэлъэ­гъугъ.

Адыгеим къэкощыгъэхэм заIокIэм КъумпIыл Мурат ахэр ыгъэгугъагъэх зигъо Iофыгъохэу къэуцухэрэр зэкIэ Адыгеим ихэбзэ къулыкъухэм зэрэзэ­шIуахыщтхэмкIэ. Пункт пэпчъ социальнэ IофышIэ гъэнэфагъэ­хэр рапхыгъэх. Нэбгырэ пэпчъ IэпыIэгъу етыгъэным пае къэкощыгъэхэм ясоциальнэ паспортхэр ахэм афагъэпсыщтых. ЦIыфхэм ясоциальнэ фэIо-фа­шIэхэм ягъэцэкIэнкIэ гупчэхэм анаIэ зытырагъэтыщтыр къэкощыгъэхэм яфэныкъоныгъэхэр ары. Унагъохэм ыкIи зизакъоу псэухэрэм зэтыгъо, джащ фэдэу мазэ къэс аратыщт ахъщэр аIэкIэгъэхьэгъэным фэшI ащ фэдэ тхылъхэр ящыкIагъэх. ЗэкIэ къэкощыгъэ кIэлэцIыкIу­хэр (ахэр нэбгыри 100 фэдиз мэхъух) гъэсэныгъэ зыщарагъэгъо­тырэ организациехэм ачIа­гъэхьащтых.

Адыгеим и ЛIышъхьэ пшъэ­рылъ зэрафишIыгъэм тетэу цIыфхэу республикэм къихьагъэ­хэм языгъэпсэфыгъо уахътэ тэрэзэу зэхэщэгъэным, тичIыпIэ анахь гъэшIэгъонхэм нэIуасэ афэшIыгъэнхэм япхыгъэ Iофыгъохэр зэшIуахыщтых. Партиеу «Единэ Россием» Херсон хэкум­рэ Донбассрэ ащыпсэухэрэм IэпыIэгъу ятыгъэнымкIэ шIушIэ Iофтхьабзэу зэрихьэхэрэр лъегъэкIуатэх.

«ТицIыфхэм шэн-хэбзэ шIагъоу ахэлъхэм зыкIэ ащыщ чIыпIэ зэжъу ифагъэхэм IэпыIэгъу афэхъу­гъэныр. Адыгеим щыпсэухэрэр шIушIэ Iофтхьабзэхэу «Единэ Россием» зэхищэхэрэм ахэлажьэх, къэкощыжьыхэрэм ямызакъоу, мобилизацием къыхиубытагъэхэми а IэпыIэгъур алъэIэсы. Рес­публикэм ипредприятиехэм, унэе предпринимательхэм, общественнэ объе­динениехэм ыкIи цIыфхэм IэпыIэгъур апкъ къекIы. Непэ анахьэу IэпыIэгъу зищыкIагъэхэм яIофыгъохэм агъэгумэкIырэ, зишIуагъэ къэзыгъэкIорэ пстэуми «тхьашъуегъэ­псэу» ясэIо!» — къыхигъэщыгъ Адыгеим и ЛIышъхьэ.

АР-м и ЛIышъхьэ ипресс-къулыкъу