АР-м и ЛIышъхьэ пшъэрылъ зэрафишIыгъэм тетэу АР-м ифедеральнэ инспектор шъхьаIэу Сергей Дрокиныр, АР-м и Къэралыгъо Совет — Хасэм и Тхьаматэу Владимир Нарожнэр, АР-м и ЛIышъхьэрэ иминистрэхэм я Кабинетрэ я Администрацие ипащэу Владимир Свеженец, рабочэ купым хэтхэр, республикэ дзэ комиссариатым Iутхэр Мыекъуапэ идзэ частьхэм ащыIагъэх.

— Мобилизацием къыхиубытагъэхэми, ахэм яунагъохэми IэпыIэгъу зэрафэхъухэрэм сшъхьэ­кIэ сылъэплъэ. Респуб­ликэм ирабочэ куп хэтхэм пшъэ­рылъ афэсшIыгъ Iофхэм язытет ренэу гъунэ лъафынэу, мобилизацием къыхиубыта­гъэхэм ялъэIухэр псынкIэу афагъэцэкIэнхэу, зэрафэлъэкIэу ахэм IэпыIэгъу афэхъунхэу. Джары Мыекъуапэ джыдэдэм щагъэхьазырхэрэ дзэ къулы­къушIэхэм зыкIаIукIагъэхэри, — къыIуагъ республикэм и ЛIышъхьэ.

КъумпIыл Мурат зэрэхигъэунэфыкIыгъэмкIэ, мобилизацием къыхиубытагъэ­хэми, дзэ частым ипащэхэми ащ фэдэ зэIукIэгъухэр бэрэ адыряIэх. Ахэм яшIуагъэкIэ хэушъхьафыкIыгъэ дзэ операциер зыщызэхащэрэ чIыпIэм агъэкIощтхэм ящыкIэгъэ пкъыгъохэр зэрагъашIэ, зыфэныкъохэ IэпыIэгъур ахэм араты. ЗэIукIэгъум икIэуххэм атетэу псынкIэу зэшIохыгъэн фэе Iофыгъохэр агъэнафэх. Урысые Федерацием зыкъэухъумэжьынымкIэ и Министерствэ ищыкIэгъэ пстэур IэкIэлъ, ау загъорэ IэпыIэгъу тедзэ ящыкIагъэу е пкъыгъо, Iэмэ-псымэ горэхэр псынкIэу аIэкIэгъэхьэгъэн фаеу мэхъу.

— ХэушъхьафыкIыгъэ дзэ операцием хэлэжьэрэ тичIыпIэ­гъухэр зыфэныкъо щыгъынхэр арагъэгъотынэу, ахэм ялъэIухэр игъом афагъэцэкIэнэу пшъэ­рылъ афэсшIыгъ. Пшъэрылъхэр зэкIэ псынкIэу зэшIохыгъэнхэ фае, — къыIуагъ КъумпIыл Мурат.