КIэлэегъадж. А гущыIэр зыфэгъэхьыгъэхэм ащыщ Пэнэшъу Раисэ.

Адыгэ Республикэм искусствэхэмкIэ иколледжэу Тхьабысымэ Умарэ ыцIэ зыхьырэм икIэлэегъаджэу Пэнэшъу Раисэ лъэпкъ культурэм щызэлъашIэ. Консерваториер Ленинград къызы­щеухым, ихэку гупсэ къыгъэзэжьыгъ.

А. С. Пушкиным ыцIэ зыхьырэ театрэм иорэдыIо куп хахьи, концертхэм ахэлажьэу ригъэжьагъ.

1960-рэ илъэсым музыкальнэ училищыр Мыекъуапэ къызыщызэIуахым, кIэлэегъаджэу рагъэблэгъагъ. ОрэдыIо хъущт ныбжьыкIэхэр ыгъасэхэзэ, ищы­Iэныгъэ искусствэм рипхыгъ.

— Училищым сызычIахьэм, Пэнэшъу Раисэ ригъаджэхэрэм сащыщыгъ, — къытиIуагъ Урысыем, Абхъазым язаслуженнэ артисткэу, Адыгэ Респуб­ли­кэм инароднэ артисткэу Нэхэе Тэ­марэ. — Мэкъэ дахэ зиIэхэм сакъы­хигъэщызэ орэд къызэрэсIощт шIыкIэм сызэрэфигъасэщтыгъэр сщыгъупшэрэп. Студент пэпчъ хэушъхьафыкIыгъэу Iоф дишIэныр шэны фэхъугъэу зэрэщытым тыгу къыIэтыщтыгъ.

— Сэ фэшъхьаф факультет сызыще­джагъэр, — тизэдэгущыIэгъу лъегъэ­кIуатэ Адыгэ Республикэм культурэмкIэ и Министерствэ иотдел ипащэу, Адыгеим культурэмкIэ изаслуженнэ IофышIэу Шэуджэн Бэлэ. — Пэнэшъу Раисэ ригъэджагъэхэм артист цIэрыIохэр къахэкIыгъэх. Джырэ уахътэ театрэхэм, республикэ филармонием, ансамблэхэм Iоф ащашIэ, лъэпкъ искусствэр лъагэу аIэты.

Дунэе фестиваль-зэнэкъокъухэм щытхъу­цIэхэр къащыдэзыхыгъэхэр бэ мэхъух. Шагудж Маринэ, Мамсыр Маргаритэ дунаим исценэ хэхыгъэхэм музыкальнэ произведениехэр къащаIозэ, цIэрыIо хъугъэх. Даутэ Сарыет, Шъхьэ­бэцэ Сыхьатбый орэдыIох, кIэлэегъа­джэх. Куфэнэ Щамсэт Адыгэ Респу­ликэм искусствэхэмкIэ иколледжэу Тхьабысымэ Умарэ ыцIэ зыхьырэм ипащ. Лаикъо Аскэр, Мамый Азидэ, фэ­шъхьафхэм Пэнэшъу Раисэ шIукIэ агу къагъэкIыжьы.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэ юбилейнэ медалыр ти ЛIышъхьэу КъумпIыл Мурат ыцIэкIэ Пэнэшъу Раисэ къызэрэратыжьыгъэм къыхэдгъэщы тшIоигъор зэлъашIэрэ кIэ­лэегъаджэм искусствэм игъогу тырищэгъэ студентхэр Адыгеим икъэралыгъо гъэпсыкIэ игъэпытэн чанэу зэрэхэла­жьэхэрэр ары.

ЩыIэныгъэр лъэкIуатэ. КIэлэегъаджэм ригъэджагъэхэр къыгоуцожьыгъэхэу Iоф зэдашIэ. НыбжьыкIэхэр апIух, агъасэх, искусствэ лъагэм екIурэ гъогум тыращэх.

«Езгъэджагъэхэм щыIэныгъэм гъэ­хъа­гъэ зэрэщашIырэм гухахъо хэсэ­гъуатэ», — къыIуагъ Пэнэшъу Раисэ.

Сахьидэкъо Нурбый.