ГъогурыкIоныр щынэгъончъэнымкIэ Къэралыгъо автоинспекцием и ГъэIорышIапIэу АР-м щыIэм тызхэт илъэсым имэзи 9-у пыкIыгъэм ышIэгъэ IофшIэныр зыщызэфахьысыжьыгъэ зэхэсыгъо щыIагъ.

Ащ иIофшIэн хэлэжьагъэх Къэралыгъо автоинспекцием ипащэ ипшъэрылъхэр зыгъэцэ­кIэрэ Хъунэго Мыхьамод, Гъэ­IорышIапIэм ипащэхэр ыкIи икъулыкъушIэхэр, район подразделениехэм ялIыкIохэр.

КъызэраIуагъэмкIэ, щылэ мазэм къыщегъэжьагъэу чъэпы­огъум нэс республикэм игъогухэм хъугъэ-шIэгъэ 270-рэ къа­щыхъугъ, ахэм нэбгырэ 44-рэ ахэкIодагъ, нэбгырэ 316-мэ шъобжхэр хахыгъэх. Статистикэм къызэригъэлъагъорэмкIэ, блэкIыгъэ илъэсым мыщ фэдэ иуахътэ егъэпшагъэмэ, авариехэм ахэкIодагъэхэм япчъагъэ нахь макIэ хъугъэ.

Авариехэм нахьыбэрэмкIэ ушъхьагъоу афэхъугъэр гъогурыкIоным ишапхъэхэр зэра­укъуагъэхэр, зикIогъу автомобилыр зэрэбламыгъэкIыгъэр, ямылъэныкъо зэрэтехьагъэхэр, псынкIэу зэрэзекIохэрэр ары.

Къэралыгъо автоинспекторхэм зэрэхагъэунэфыкIыгъэмкIэ, гъогухэм щынэгъончъэныр ащыгъэ­пытэгъэнымкIэ зишIуагъэ къа­кIорэр джырэ шапхъэхэм адиштэу республикэм игъогухэр зэрэзэтырагъэпсыхьэхэрэр, нэфрыгъуазэхэр, камерэхэр зэрэтырагъэуцохэрэр, пэшIорыгъэшъ Iофтхьабзэхэр зэпымыоу зэрэзэхащэхэрэр ары.

2022-рэ илъэсым имэзи 9 Iофтхьэбзэ ыкIи рейд 460-м ехъу зэхащагъ. Гъэсэныгъэм иучреждениехэм зэдэгущыIэгъу 400 фэдиз ащырагъэкIокIыгъ. Пропагандэ IофшIэныр къэмыуцоу социальнэ хъытыум щыпхыращы.

Къулыкъум иIофшIэнкIэ нахь агъэлъэшын ыкIи нахьышIу ашIын фэе лъэныкъохэм зэхэсыгъом хэлэжьагъэхэр ащытегущыIагъэх.