Граждан Iофхэм язытет тхыгъэнымкIэ Мыекъуапэ иотдел автоинспекторхэр щыIагъэх. Джэгу Iофтхьабзэхэм ахэтхэр щынэгъончъэу гъогум зэрэщызекIощтхэ шапхъэхэр агу къагъэкIыжьыгъэх.

Джащ фэдэу джэгум хэт машинэхэр зэхэтхэу урамым къырыкIохэ зыхъукIэ псынкIэу мычъэнхэм, зэпэблагъэу зэхэмылъэдэнхэм щынэгъончъэным ылъэ­ныкъокIэ мэхьанэшхо зэриIэр къыхагъэщыгъ. Шъон пытэхэр зызэрахьылIэхэкIэ ямашинэхэр агъэуцунхэшъ, такси е общественнэ транспортыр водительхэм къыз­фагъэфедэнхэу зафагъэзагъ.

Ны-тыхэу сабый зыкIыгъухэри къулыкъушIэхэм ащыгъупшагъэхэп. Чэфыгъо-гушIуагъом зэлъиштэхэу кIэлэцIыкIухэр ащыгъупшэхэу машинэм къырамынэнхэу араIуагъ ыкIи хэушъхьафыкIыгъэ тIысыпIэр, щынэгъончъэ бгырыпхыр къызфагъэфедэнхэу атырагъэпытыхьагъ.

Зэшъхьэгъусэ зэфэхъугъэ ныбжьыкIэхэм гъогурыкIоным ишапхъэхэр зэрагъэцэкIэщтхэр унэгъуакIэу ашIэщтым хэбзэшIоу илъынэу афэлъэIуагъэх. Унэгъо альбомым дэхьащт нэпэеплъ сурэтхэр къэзэрэщэхэрэм инспекторхэр акIыгъухэу атырахыгъэх.