Поселкэу Яблоновскэм иурамэу Дорожнэм тет унэу N 63-м ищагу зэтегъэпсыхьэгъэным епхыгъэ IофшIэнхэр загъэцэкIэхэ ужым ар дэхэ дэдэ хъугъэ.

— Лъэпкъ проектэу «ПсэупIэр ыкIи къэлэ щы­IакIэр» зыцIэм ишъолъыр проектэу «ШэпхъэшIухэм адиштэрэ къэлэ щыIакIэр гъэпсыгъэныр» зыфиIорэм къыдыхэлъытагъэу мы щагум изэтегъэпсыхьан сомэ миллиони 2-рэ мин 800-рэ пэIухьагъ, — къыщытфаIотагъ поселкэу Яблоновскэм иадминистрацие. — ПшъэдэкIыжь зыхьырэ обществэу «ДЖТ-ДЖИ-СИ» IофшIэнышхо мыщ щишIагъ, щагур агъэкIэжьыгъ, Iоф­шIэнхэр игъом ыкIи дэ­гъоу агъэцэкIагъэх.

ЛъэсрыкIо гъогухэр агъэкIэжьыгъэх, къэзы­гъэнэфырэ пкъыгъохэр зэблахъугъэх. Зызыща­гъэпсэфыщт пчэгур Iэ­рыфэгъоу ашIыгъ: унэ чIэхьэгъумэ асфальтыр атыралъхьагъ, зыгъэпсэфыпIэ чIыпIэхэр зэты­рагъэпсыхьагъэх, тIысыпIэхэр агъэуцугъэх, гъучI чэу цIыкIухэмкIэ къа­шIы­хьагъэх.

ПсэолъэшIхэм къызэраIорэмкIэ, щагур агъэ­кIэжьы зэхъум унэм чIэс­мэ яшIоигъоныгъэхэр къы­­далъытагъэх.

— ЫпэкIэ щагур нэ­кIыгъэ, джы, сыд фэдэрэ уахътэ пштагъэми, мыщ сабый щхы макъэр дэIукIы, нахьыжъхэми ныбжьыкIэхэми зыщагъэ­псэ­фы, гупсэфыпIэ афэ­хъугъ, — къаIуатэ цIыфмэ. — Лъэпкъ проектым ишIуагъэкIэ тищыIакIэ нахьышIу хъугъэ, къытфэгумэкIыгъэхэм зэкIэми тхьашъуегъэпсэу ятэIо.