2018-рэ илъэсым ищылэ мазэ и 1-м къыщыублагъэу унагъоу ны мылъкур зиIэм игъот макIэмэ, ащ къыхэхыгъэу ахъщэ тын мазэ къэс къыфэкIонэу ыгъэпсын ылъэкIыщт.

Ар къытефэмэ ышIэным пае аужырэ мэзэ 12-м гъотэу яIа­гъэр нэбгырэ пчъагъэу исым тырагощэн фае. Зы нэбгырэм тефэрэр цIыфыр зэрэпсэун ылъэкIыщт ахъщэ анахь макIэу субъектым щагъэнэфагъэм фэдитIум нэмысырэмэ, лъэIу тхылъыр ытын фит. Ащ тетэу унагъом ыгъэфедэн ылъэкIыщтыгъэр ятIонэрэ сабыир къызэрэхъугъэм пае къатыгъэ ны мылъкур ары.

Джы УФ-м IофшIэнымкIэ ыкIи цIыфхэр социальнэу къэухъумэгъэнхэмкIэ и Министерствэ къызэритыгъэмкIэ, ятIонэрэ кIэлэцIыкIур унагъом къихъухьагъэмэ, хьауми апэрэмэ, ящэнэрэ е ащ къыкIэлъэкIомэ емылъытыгъэу ны мылъкум къыхэхыгъэ ахъщэ тын мазэ къэс къыфэкIонэу ыгъэпсынэу фитыныгъэ къэзытырэ унашъом ипроект агъэхьазырыгъ. «Универсальнэ пособием» фэгъэхьыгъэ хэбзэгъэуцугъэм ипроектэу УФ-м и Къэралыгъо Думэ апэрэ еджэгъумкIэ ыштагъэм къыдэлъытагъэхэр гъэцэкIэгъэнхэм фэшI ар зыкIагъэхьазырыгъэр.

— «Универсальнэ пособием» фэгъэхьыгъэ хэбзэгъэуцугъэм ипроект къызэрэщиIорэмкIэ, унагъом гъотэу иIэр нэбгырэ пчъа­гъэу исым тегощагъэу, зы нэбгырэм тефэрэр цIыфыр зэрыпсэун ылъэкIыщт ахъщэ анахь макIэу агъэнэфагъэм фэдитIум кIэмыхьэрэмэ, сабыир апэрэми, ятIонэрэми, ащ къыкIэлъэкIоми емылъытыгъэу, ны мылъкум къыхэхыгъэ ахъщэ тыныр мазэ къэс къыфэкIонэу ыгъэпсын ылъэкIыщт. Унагъом ахъщэр зэрищыкIагъэм уасэ фэзышIырэ тхылъэу нахьыпэкIэ агъэхьазырыщтыгъэхэри ищыкIэгъэжьыщтхэп, — къетхы УФ-м IофшIэнымкIэ ыкIи цIыфхэр социальнэу къэухъумэгъэнхэмкIэ и Министерствэ.

Ны мылъкум къыхэхыгъэ ахъщэу унагъом къыфэкIощтыр кIэлэцIыкIур зэрыпсэун ылъэкIыщт ахъщэ анахь макIэу агъэнэфагъэм фэдиз. «Универсальнэ пособиеу» къихьащт 2023-м къатынэу рагъэжьэщтым игъусэу ар къэкIощт.