Чъэпыогъум и 29-м Мыекъуапэ, джащ фэдэу тиреспубликэ ирайон заулэмэ чIыгур зэращысысыгъэр бэмэ зэхашIагъ.

Урысыем и ЗыкI геофизическэ къу­лыкъу къызэритыгъэмкIэ, сыхьатыр 12.59-м чIыгусысыныр щыIагъ. Адыгеим имызакъоу, Краснодар краим ит къалэу Шытхьалэ чIыгур щысысыгъ, магнитудэр балли 4,2-рэ хъущтыгъэ.

АР-м ошIэ-дэмышIэ IофхэмкIэ и Гъэ­IорышIапIэ ипресс-къулыкъу къызэритыгъэмкIэ, чIыгусысыныр зэхэзышIагъэхэм ащыщ Мыекъопэ ыкIи Джэджэ районхэр. Зыпари зэхикъутагъэп ыкIи зыпарэми иягъэ ригъэкIыгъэп.

Адыгэ къэралыгъо университетым хэт «Центр интеллектуальных геоинформационных технологий» зыфиIорэм ипащэу Татьяна Варшанинам къызэриIуагъэмкIэ, къушъхьэм къыпэблэгъэ чIыпIэхэм мыщ фэдэ чIыгусысыныр ащэхъу хабзэ. Мы мафэхэм щыIагъэм зыпари щынагъо къызыдихьыгъэп. Мыщ фэдэ чIыгусысынхэр мэхъу зэпытых, ахэр тэ ренэу зэхат­шIэхэрэп. Адыгеим щыпсэухэрэр ащ щы­щынэнхэу ыкIи ыгъэгумэкIынхэу щытэп.

Экспертым къызэриIуагъэмкIэ, магнитудэр балли 5-м къыщегъэжьагъэу чIыгур зысысыкIэ ары узигъэгумэкIынэу щытыр. КIарэ Фатим.