Адыгеим щыщхэу мобилизацием хэфагъэхэм ыкIи ахэм яунагъохэм IэпыIэгъу афэхъугъэным иIофыгъохэр республикэм чанэу щызэшIуахых, мы мафэхэми мыщ епхыгъэ Iофтхьабзэхэр лъагъэкIуатэх.

АР-м и ЛIышъхьэу КъумпIыл Мурат ыкIи политическэ партиеу «Единэ Россиер» мы ­пшъэрылъхэм ягъэцэкIэн лъэ-шэу анаIэ тет.

— Зэтыгъо тынхэр зэраIэ­кIэдгъахьэхэрэм имызакъоу дзэкIолIхэм яунагъохэм ягумэкIыгъохэр зэрэзэшIотхыщтым тыпылъ. Ащ пае муниципалитет пэпчъ унашъо фэсшIыгъ IофшIэкIо купхэр зэхащэнхэу ыкIи мобилизацием хэфагъэхэм яунагъохэм социальнэ пас­портхэр афагъэпсынхэм ыуж ихьанхэу. Мы уахътэм ехъулIэу социальнэ къулыкъухэм зэкIэми ыпшъэкIэ зигугъу къэт­шIыгъэ унагъохэу гумэкIыгъо зиIэхэм IэпыIэгъу афэхъугъэнымкIэ анкетирование зэхащэ. Ащ нэмыкIэу мобилизацием хэфагъэхэм ыкIи гу­фитхэм якIэлэцIыкIухэу еджапIэхэм ачIэсхэм ыпкIэ зыхэмылъ шхыныгъохэр аIэкIэтэ­гъахьэх, ны-тыхэм кIэлэцIыкIу IыгъыпкIэм ыуасэ атырэп, — къыIуагъ КъумпIыл Мурат.

Республикэм ипащэ къызэрэхигъэщыгъэмкIэ, партиеу «Единэ Россием» иIэпыIэгъукIэ мобилизацием хэфагъэхэм апае щазмэхэр, ощхым ущызыухъумэщт щыгъынхэр, аптечкэхэр, нэмыкIэу ящыкIэгъэщтхэр къащэфыгъэх, ахэр военкоматым IэкIагъэхьагъэх.

«КIалэмэ тихэгъэгу къаухъу­мэ, мамырэу цIыфхэм Iоф ашIэн ыкIи псэунхэ амал араты. ЗэрэтфэлъэкIэу ахэм IэпыIэгъу яттын фае зэолIхэр яунагъохэм къафэмыгумэ­кIынхэм пае. Мобилизацием хэфагъэхэм яунагъохэми Iэпы­Iэгъу тафэхъун ыкIи ахэм яуна­гъохэм тынаIэ атедгъэтын фае», — къыIуагъ КъумпIыл Мурат.

Мы зигугъу къэтшIыгъэ IэпыIэгъур непи лъагъэкIуатэ. ГущыIэм пае, лъэпкъ Iэмэ-псы­мэхэм ыкIи IэшIагъэхэм я Ассоциацие епхыгъэ цехэу адыгэ шъуашэхэр зыщадыхэрэр дзэ­кIолIхэр ощхым щызыухъумэщт щыгъынхэм ыкIи зыщычъыенхэ алъэкIыщт дзыохэм ядын фе­жьагъ.

Цехым ипащэу Боджэкъо Бэллэ къызэриIуагъэмкIэ, мы пкъыгъохэр адынхэмкIэ за­къы­фэзыгъэзагъэхэр партиеу «Еди­нэ Россием» ишъолъыр къута­мэрэ организациеу «Адыгеим ибзылъфыгъэхэм я Союз» зыфиIорэмрэ.

— КъыдэдгъэкIын фаер зэ­рэбэм къыхэкIэу нэмыкI цIыфхэр мы IофшIэным къесщэ­лIагъэх. Ощхым ущызыухъумэщт щыгъын ыкIи узыщычъыен плъэкIыщт дзыо мин тыдынэу пшъэрылъ къытфашIыгъ ыкIи ар охътэ кIэкIым дгъэцэ­кIэщт, — къыIуагъ цехым ипа­щэу Боджэкъо Бэллэ.

КIарэ Фатим.