Пшызэ икъэзэкъхэм ядзэ зызэхащагъэр илъэс 326-рэ зэрэхъугъэм, ахэм я Мафэ афэгъэхьыгъэ зэхахьэхэр Краснодар краим, Адыгеим ащыкIуагъэх.

Пшызэ икъэзэкъхэм япащэ игуадзэу Максим Медянниковыр, Мыекъуапэ икъэзэкъхэм яотдел ипащэу Александр Даниловыр Апшеронскэ щыкIогъэ зэхахьэм къыщыгущыIагъэх. Япшъэрылъхэр дэгъоу зыгъэцэкIэхэрэ Александр Корос­тылевым, Сергей Хлудневым, нэмыкI къэзэкъ пащэхэм афэгушIуагъэх, щытхъу тхылъхэр аратыжьыгъэх.

ХэушъхьафыкIыгъэ дзэ операциеу Донецкэ ыкIи Луганскэ народнэ республикэхэм ащыкIорэм къэзэкъхэр зэрэ­хэлажьэхэрэм, шIушIэ IэпыIэ­гъу­хэр зэрэзэхащэхэрэм, фэшъхьафхэм атегущыIагъэх.

Джэджэ, Шытхьэлэ, Мостовской, Красногвардейскэ рай­онхэм, нэмыкIхэм къэзэкъхэм ямафэхэр ащызэхащагъэх, тхьэ­лъэIухэр ащыкIуагъэх. Спорт джэгунхэр, къэзэкъхэм яшэн-­хабзэхэм, нэмыкIхэм яхьы-лIэгъэ зэIукIэгъухэр гъэшIэгъо­ныгъэх.

Зэнэкъокъухэм, Iофтхьабзэ­хэм чанэу ахэлэжьагъэхэм шIу­хьафтынхэр афагъэшъоша­гъэх. Адыгеим икъэзэкъ ныбжьыкIэхэм я Союз икъутамэу Кощхьаблэ щызэхащагъэр анахь дэгъухэм ахалъытагъ.

Екатерина Загорулько. Мыекъуапэ икъэзэкъхэм яот­дел ипащэ игуадз.