Ордэкъо Астемир ирекорд
Белоруссием атлетикэ онтэгъумкIэ дунэе зэIукIэгъухэр мы мафэхэм щэкIох.
— Илъэс 13 —– 17 зыныбжь кIэлэеджакIохэр Минскэ щызэнэкъокъух, — къытиIуагъ Адыгэ Республикэм атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм ипащэу Сихъу Рэмэзан. — Урысыем ихэшыпыкIыгъэ ныбжьыкIэ командэ хэтэу Ордэкъо Астемир килограмм 49-м нэс къэзыщэчыхэрэм янэкъокъугъ.
Нарт шъаом тIоштэгъукIэ кг 159-рэ къыIэти, апэрэ чIыпIэр къыдихыгъ. Щылычым ебэнызэ, шIыкIэу рывокыр ыгъэцакIи, Урысыем ирекорд ыгъэуцугъ.
Адыгэ Республикэм, Урысыем щытхъур къафэзыхьыгъэ батырыр Хьатыгъужъыкъуае щыщ, илъэс 14 ыныбжь, тренерэу Хьагъур Рэджэб егъасэ.
Ордэкъо Астемир, тренерхэм, кIэлэегъаджэхэм, Iахьылхэм тафэгушIо, ирекордхэм ахигъэхъонэу Тхьэм тыфелъэIу. Опсэу, Астемир!
ЕмтIылъ Нурбый.