АР-м и ЛIышъхьэу КъумпIыл Мурат кIэщакIо фэхъугъэу, Шэуджэн районым администрацием ипащэу Аулъэ Рэщыдэ зитхьамэтэ IофышIэ куп щызэхащагъ. Ащ мобилизацием епхыгъэ пшъэрылъхэр гъэцэкIагъэ зэрэхъухэрэм ынаIэ тетыщт, цIыфэу закъыфэзыгъазэхэрэм ялъэIухэм Iоф адишIэщт.

IофышIэ купым районым ипащэ игуадзэхэр, социальнэ учреждениехэм, чIыпIэ зыгъэIорышIэжьыпIэхэм япащэхэр, военкоматым илIыкIохэр хагъэхьагъэх. Мы уахътэм ахэм мобилизацием хэфагъэхэм яунагъохэр къакIухьэх, щыкIагъэу яIэхэм защагъэгъуазэ.

Шэуджэн район администрацием ипресс-къулыкъу къызэритыгъэмкIэ, тхьама­фэм ыкIэм нэс зэкIэ унагъохэр къакIухьанхэу, охътабэ тырамыгъашIэу ящыкIэгъэ IэпыIэгъур арагъэ­гъотынэу Аулъэ Рэщыдэ пшъэрылъ афигъэуцугъ.

Республикэм ирайон пстэуми мыщ фэдэ Iоф­тхьабзэхэр ащырагъэкIо­кIынхэу пшъэрылъ яI, ащ фэлажьэх.