Непэрэ мэфэкIым ипэгъокIэу АР-м иветеранхэм я Со­вет, фондэу «ТекIоныгъ» зыфиIорэм, Адыгэ Хасэм ахэ­тэу, АР-м имэз хъызмэт иветеранхэм я Совет итхьаматэу Болэкъо Аслъанчэрые гущыIэгъу тыфэхъугъ.

ЩыIэх цIыфхэр уадэгущыIэнкIэ гъэшIэгъонэу, щыIэныгъэм шIэныгъэу хихыгъэмкIэ ягуапэу адэгуащэхэрэр. Джащ фэд Аслъанчэрые. Мыр республикэм щызэлъашIэрэ общественник, зэхэщэкIо пэрыт, тишъолъыр щызэхащэрэ Iофтхьабзэхэм чанэу ахэлажьэ. Илъэс 40-м ехъурэ ащ мэз хъызмэтым пэщэ Iэна­тIэхэр щигъэцэкIагъ, чIыопсым икъэухъу­мэн ищыIэныгъэ фигъэхьыгъ. ИIофшIэн щытхъу ыкIи рэзэныгъэ тхылъ зэфэ­шъхьафхэмкIэ уасэ къыфашIыгъ, УФ-м имэз хъызмэт иIофышIэ гъэшIуагъ, АР-м изаслуженнэ мэзгъэкI. Джы ежь фэдэ ветеранхэм яшIоигъоныгъэхэм, ягумэкIыгъохэм язэшIохын чанэу ыуж ит.

Ветераным и Мафэ тигущыIэгъу мэхьанэшхо реты.

— Мыщ фэдэ мэфэкI зыдэщыIэр Адыгей закъор ары. Нахьыжъхэм шъхьэ­кIэфэныгъэ зэрафашIырэр, мэхьанэ зэраратырэр тилъэпкъ изы нэшанэхэм ащыщ ыкIи гущыIэжъэу «Нахьыжъ уимы­Iэу нахьыкIэ уиIэщтэп» зэраIорэм мы мэфэкIыр ишыхьат хъугъэ. Илъэс пчъа­гъэрэ Iоф зышIагъэу тIысыжьыгъэхэр, зэо зэфэшъхьафхэр зэпызычыгъэхэр унэм иубытагъэу имысхэу республикэм ихэхъоныгъэ, ищыIэкIэ-псэукIэ чанэу хэлэжьэнхэмкIэ ар зы амалэу щыт, — къыIуагъ Аслъанчэрые.

Джащ фэдэу тигущыIэгъу зипэщэ мэз хъызмэтым иветеранхэм я Совет хэтхэм анаIэ атырагъэтынымкIэ, ящыIэкIэ-­псэ­укIэ нахьышIу ашIынымкIэ, япсауныгъэ зыпкъ рагъэуцонымкIэ лъэшэу IэпыIэгъу къафэхъухэрэм ягугъу къы­шIыгъ. Адыгеим и ЛIышъхьэу КъумпIыл Мурат, АР-м псауныгъэр къэухъумэгъэнымкIэ иминистрэу Мэрэтыкъо Рустем, IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч, мэзхэмкIэ ГъэIорышIапIэм ипащэу Былымыхьэ Рэщыдэ лъэшэу зэрафэразэр зэдэгущыIэгъум къыщыхигъэщыгъ. Тинахьыжъхэм алъэныкъокIэ сыд фэдэрэ IофыгъокIи мыхэм зафагъэзагъэу зэшIуамыхыгъэ къыхэкIыгъэп, ветеранхэр апэ рагъэшъыхэзэ зэрагъашIохэрэр хигъэунэфыкIыгъ. Джащ фэдэу Къоджэ Аслъанрэ Нэхэе Юрэрэ яIофшIакIэ, яцIыфыгъэ фэгъэхьыгъэу гущыIэ дахэхэр къыIуа­гъэх.

Болэкъо Аслъанчэрые ежь фэдэ гупшысакIэ, идее зиIэ цIыфхэр зэхиугъоенхэр, зэрищэлIэнхэр икIас. IофшIэнэу зыфежьэрэм пшъэдэкIыжь гъэнэфагъэ фыриIэу екIуалIэ. ГумэкIыгъо зиIэм едэIун елъэкIы, гукIэгъу хэлъ, фэлъэкIыщтымкIэ IэпыIэгъу афэхъу, нэбгырэ пэпчъ екIолIакIэ къыфегъоты. Ащ пае ежьыри шIу алъэгъу, лъытэныгъэ фашIы. Аслъанчэрые удэгущыIэ зыхъукIэ, шIур гум къырегъахьэ, нэмыкI цIыфхэу укъэ­зыуцухьэхэрэм зыгорэкIэ IэпыIэгъу уафэхъу пшIоигъо уешIы.

Илъэс пчъагъэхэм мэз хъызмэтым Iоф щызышIагъэм мэзым хэтыныр непи икIас. Ахэм ахэс псэушъхьэхэм, чъыг тхьапэ цIыкIум нэсыжьэу уафэсакъын зэрэфаер къыткIэхъухьэрэ ныбжьыкIэхэм арегъашIэ. Мэзхэм якъызэтегъэнэн­кIэ, ягъэкъэбзэнкIэ шэмбэт шIыхьафэу зэхащэхэрэм, мэз фондым иуплъэкIун чанэу ахэлажьэ.

Мы зэпстэуми адакIоу икъоджэ гупсэу къызщыхъугъэ Блащэпсынэ ыгу икIырэп, шIу елъэгъу, ичIыпIэгъухэм афэгумэкIы. Общественнэ шIушIэ организациеу «Блащэпсын» зыфиIорэм итхьаматэ игуадз, къуаджэм игумэкIыгъохэм язэшIохын ар хэлажьэ. ЗыгъэпсэфыпIэ чIыпIэу «Псынэ цIыкIу» зыфиIоу чылэм дэтым изэтегъэ­псыхьан иIахьышIу хилъхьагъ. Мы чIыпIэми, гурыт еджапIэми адагъэтIысхьэгъэ чъыгхэр Аслъанчэрые афищагъэх.

ЩыIэныгъэр лъэныкъуабэу зэхэт. Болэкъо Аслъанчэрыерэ ишъхьэгъусэу Фатимэрэ зызэдэпсэухэрэр илъэс 50 хъущт. КIэлитIурэ пшъашъэрэ зэдапIугъ. Ахэм щыIэныгъэм чIыпIэ дахэхэр щаубытыгъэу, ящытхъу арагъэIозэ мэпсэух.

— Тилъфыгъэхэм апшъэрэ гъэсэныгъэ ядгъэгъотыгъ, унагъохэр яIэхэу, зэдэIужьхэу мэпсэух. Ахэр зэгурыIохэу щыIэхэмэ ны-тыхэмкIэ насыпышху. Тимафэхэр къытфэзыгъэдэхэрэ къорэлъф­пхъорэлъфхэм джы шэн-хэбзэ дахэу тиIэхэр зэрахэтлъхьащтхэм ыуж тит, зэрэтфэлъэкIэу адыгагъэм фэтэгъасэх, гъогу занкIэ рыкIонхэм фэтэпIух, — еIо Аслъанчэрые.

Iэшъынэ Сусан.