Мыекъопэ къэзэкъ отделымрэ Адыгеим ис къэзэкъ ныбжьыкIэхэм я Союзрэ Украинэм щыкIорэ хэушъхьафыкIыгъэ дзэ операцием хэлэжьэрэ къэзэкъхэу ежьхэм яшIоигъоныгъэкIэ кIуагъэхэм, джащ фэдэу Донбасс щыпсэухэрэм апае зичэзыу шIушIэ IэпыIэгъур атIупщыгъ.

Бжыхьэ-кIымэфэ кIэлэцIыкIу ыкIи нахьыжъхэм апае щыгъын­хэр, лъэкъопылъхьэхэр, гъомылапхъэхэр, псэу зэшъощтхэр, Iэзэгъу уцхэр, тутынхэр, кIэлэцIыкIу гъомылапхъэхэр, памперсхэр ыкIи нэмыкIыбэр — пстэумкIи тонни 10-м ехъу Мыекъопэ къэзэкъ отделым хэ­хьэрэ район къэзэкъ обществэ пстэуми, еджапIэхэм ачIэс­хэм, предпринимательхэм, Адыгеимрэ Пшызэ шъолъырымрэ арысхэм къаугъоигъ.

ПсэупIэу Яблоновскэм дэт гурыт еджапIэу N 15-м чIэсхэм, кIэлэегъаджэхэм, ны-тыхэм шIушIэ IэпыIэгъоу къэмлан 24-рэ къаугъоигъ.

ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Молзавод Новый» зыфиIорэм игенеральнэ пащэу, муниципальнэ образованиеу «Джэджэ районым» инароднэ депутатхэм я Совет идепутатэу, партиеу «Единэ Россием» ифрак­цие хэтэу Александр Купиныр кIэщакIо зэрэфэхъугъэм тетэу хэушъхьафыкIыгъэ дзэ операцием хэлажьэхэрэм афа­тIупщыгъ адыгэ къое гъугъэ килограмм 500, пхъэшъхьэ­-мышъхьэ ыкIи хэтэрыкI тонным ехъу. Ащ фэдэ IэпыIэгъум мэхьанэшхо иI, сыда пIомэ дзэ­кIолIхэр мафэм щэ агъашхэх. Ащ нэмыкIэу кIэлэцIыкIухэм ыкIи кIэлэеджакIохэм дзэкIолI­хэм афатхыгъэ письмэхэр афа­тIупщыгъэх, псаухэу, текIоныгъэр къыдахыгъэу ахэр къэкIо­жьхэмэ зэрашIоигъор къыха­гъэщыгъ.

ЫпэкIэ къэзэкъ отрядым иIэ­гъэ транспортыр Краснэ Лиманым пыим зэрэщакъутагъэм къыхэкIэу шIушIэ ахъщэ Iэпы­Iэгъоу къаугъоигъэмкIэ автомобилэу «Нива» къащэфыгъ. Хэу­шъхьафыкIыгъэу тызэрафэразэр къатIомэ тшIоигъу псауныгъэм икъэухъумэнкIэ къэралыгъо бюджет учреждениеу «Белореченскэ гупчэ район сымэджэщыр» зыфиIорэм (сомэ мин 83-рэ къаугъоигъ), мы районым щыпсэухэрэм (сомэ мин 43-рэ), Мостовской районым ипсэупIэу Шедок дэсхэм (сомэ мин 23-рэ), Краснодар краимкIэ псэупIэу Мостовскоим дэс Гарик Азарян (сомэ мин 60), Мыекъопэ къэзэкъ отделым икъэзэкъхэм ыкIи иатаманхэм.

ТидзэкIолIхэм апае Апшеронскэ районым ис къэзэкъхэм «Нива» зыфиIорэм фэдэу авто­мобилитIу къащэфыгъ. Ахэр по­лигонэу «Раевский» зыцIэу Новороссийскэ щыIэм нагъэсыгъэх.

Общественнэ ветеран организациеу къэралыгъо гъунап­къэм иухъумакIохэм Мостовской районым щызэхащагъэм («Пограничное братство» зыфиIорэм) машинэхэм апае щэрэхъхэр афитIупщыгъэх.

Мы шIушIэ IэпыIэгъур чIыпIэу зынагъэсыщтым нэс ягъусэщтых Мыекъопэ къэзэкъ отделым иатаманэу Александр Даниловымрэ ащ игуадзэу Александр Роговымрэ. Ащ нэмыкIэу Джэ­джэ районымкIэ Гречко зэшхэу Викторрэ Владимиррэ, Кощ­хьэблэ районымкIэ Олег Тарасенкэр, Апшеронскэ районымкIэ атаманэу Сергей Коростылевыр, штабым ипащэу Сергей Хлудневыр, къалэу Мыекъуапэ икъэ­зэкъ обществэ иштаб ипащэу Сергей Гетманскэр. Мы Iоф­тхьабзэм чанэу хэлэжьагъэх къалэу Мыекъуапэ щызэхащэгъэ къутамэу «Адыгеим икъэзэкъ ныбжьыкIэхэм я Союз» зыфиIорэм хэхьэрэ Максим Кубиковыр ыкIи къалэу Мыекъуа­пэ икъэзэкъ отдел иатаманэу Виктор Остапенкэр.

ЦIыф гумэкIылэхэр, зишIуагъэ къэзыгъакIо зышIоигъохэр бэ зэрэхъухэрэр лъэшэу тигуапэ. ШIушIэ IэпыIэгъум икъэугъоин бэ къыхэлэжьагъэр: еджапIэхэм, кIэлэцIыкIу IыгъыпIэхэм ачIэс­хэр, ахэм янэ-ятэхэр, предприя­тиехэм ащылажьэхэрэр, Адыгэ ыкIи Мыекъопэ епархием иIофышIэхэр, волонтерхэр. ЗэкIэми лъэшэу тафэраз. ШIушIэ IэпыIэгъум иугъоин лъэкIуатэ.

Адыгеим щызэхэщэгъэ кIэлэцIыкIу-ныбжьыкIэ общественнэ движениеу «Адыгеим икъэзэкъ ныбжьыкIэхэм я Союз» зыфи­Iорэм шIушIэ IэпыIэгъум ­иугъоин зыщыкIощт чIыпIэр ыгъэнэфагъ. Пшызэ шъолъыр къэзэкъыдзэм и Мыекъопэ къэзэкъ отдел зы­дэщыIэм ар щыкIощт: Адыгэ Республикэр, къ. Мыекъуапэ, ур. Пионерскэр, 328. Телефоныр: 79627678193.

Екатерина Загорулько.