АР-м и Къэралыгъо Совет — Хасэм зичэзыу я XVI-рэ зэхэсыгъо тыгъуасэ иIагъ. Ар зэрищагъ Парламентым и Тхьаматэу Владимир Нарожнэм.

Федеральнэ къэралыгъо хэ­бзэ къулыкъу зэфэшъхьафхэм афэгъэзэгъэ джэпсалъэу 8 депутатхэм мы зэхэсыгъом ща­штагъ. Непэ зигъо Iоф зэфэ­шъхьафхэм ахэр афэгъэ­хьыгъэх. ГущыIэм пае, УФ-м и Правительствэ и Тхьаматэ игуадзэу Татьяна Голиковам фагъэзагъэр хэбзэгъэу­цугъэр амыукъоу псэупIэ къэзыщэфыхэрэм яфитыныгъэхэр къэухъумэгъэнхэм фэгъэ­хьыгъ.

Ны мылъкур ыгъэфедэзэ унагъом унэ къызищэфкIэ кIэлэцIыкIухэмрэ ны-тыхэмрэ ар зэдыряенэу, нэбгырэ пэпчъ Iахь щыриIэнэу федеральнэ хэбзэгъэуцугъэм къыщеIо. Ау ар гъэцэкIагъэ зэрэхъурэм къэралыгъор лъыплъэжьынэу шIыкIэ гъэнэфагъэ щыIэп. Ащ фэшI зэшъхьэгъуситIум язырэм иза­къоу унэр къыфанэу, нэмыкI­хэм ар арищэжьэу бэрэ къы­хэкIы. Ащ фэдэ псэупIэр зыщэфыжьыхэрэм зэрарышхо ашIыным ищынагъо къэуцу. Сыда пIомэ, хьыкумым Iофыр нэсэу, ар зыхаплъэкIэ, унэм ищэфынкIэ зэзэгъыныгъэу лъэныкъуитIум зэдашIыгъэм кIуачIэ имы­Iэжьынэу рихъухьащт. Ахэр къыдалъытэзэ, законым джыри зэ хэплъэжьынхэшъ, ны мылъкур агъэфедэзэ ащэфыгъэ псэупIэхэм япхыгъэ тхылъхэр зэрагъэпсыхэрэм къэралыгъор зэрэлъыплъэщт шIыкIэ агъэ­нэфэным Адыгеим и Парла- мент идепутатхэр кIэщакIо фэ­хъугъэх.

Адрэ джэпсалъэу аштагъэхэр политическэ партиехэм яшъо­лъыр къутамэхэр зэфэсхэм, зэхэсыгъохэм пэIудзыгъэ шIыкIэм тетэу ахэлэжьэнхэм, УФ-м бюджетымкIэ, къэлэгъэпсынымкIэ икодексхэм, федеральнэ хэбзэгъэуцугъэ зэфэшъхьафхэм зэхъокIыныгъэхэр афэ­шIыгъэнхэм, нэмыкIхэм афэ­гъэхьыгъэх.

АР-м ихэбзэгъэуцугъэ 18-ми зэхэсыгъом щатегущыIагъэх. УФ-м зыкъэухъумэжьыгъэ­нымкIэ и Министерствэ пшъэ­рылъэу иIэхэр гъэцэкIэгъэнхэм зиIахь хэзылъхьанэу, ежь ишIоигъоныгъэкIэ зэзэгъыны­гъэм кIэтхагъэхэм, мобилизацием хэфагъэхэм ыкIи ахэм яунагъохэм IэпыIэгъу ятыгъэным тегъэпсыхьагъэхэу законитIу депутатхэм аштагъ. Зыр зигугъу къэтшIыгъэхэм аха­хьэхэрэм ыпкIэ хэмылъэу юридическэ IэпыIэгъу ятыгъэным фэгъэхьыгъ. ЯтIонэрэм мы унагъохэм къарыкIыгъэ кIэлэцIыкIухэмрэ зихэхъогъухэмрэ ыпкIэ хэмылъэу еджапIэхэм ащагъэшхэнхэу къыщеIо.

Административнэ хэукъоныгъэхэм афэгъэхьыгъэ республикэ хэбзэгъэуцугъэу «энергетиккIэ» заджэхэрэ шъонхэр зыныбжь имыкъугъэхэм ара­мыщэнхэу къызщиIорэми зэ­хъокIыныгъэхэр фашIыгъэх. Ащ фэгъэхьыгъэ законопроектым кIэщакIо фэхъугъэх Красно­гвардейскэ районым инароднэ депутатхэр.

2015-рэ илъэсыр ары мы шъолъыр хэбзэгъэуцугъэр заштагъэр. Гъэсэныгъэм, медицинэм япхыгъэ учреждениехэм, цIыфыбэ зыхэлажьэрэ Iоф­тхьабзэхэр зыщызэхащэрэ чIыпIэхэм апэблагъэу «энергетикхэр» щаIуагъэкIынхэ фимытыхэу ащ къыщеIо. Ау ар зыукъохэрэм пшъэдэкIыжьэу ахьыщтыр щыгъэнэфагъэп. Ащ фэшI ар гъэцэкIагъэ зэрэхъурэм лъыплъэщтхэмрэ, хэукъоныгъэ зышIыгъэхэм пшъэдэкIыжь зэрахьыщтым фэгъэхьыгъэ тхылъыр зэхэзгъэуцощтхэмрэ гъэнэфэгъэнхэм фэгъэ­хьыгъэ зэхъокIыныгъэ фэшIыгъэнэу зэдаштагъ.

Зигугъу къэтшIыгъэ хэбзэ­гъэуцугъэхэм анэмыкIэу, зекIоным изегъэушъомбгъун фэгъэзэгъэ къэралыгъо хэбзэ къулыкъухэм япшъэрылъхэм, ошIэ-дэмышIэ Iофхэм къыздахьырэ тхьамыкIагъохэм цIыфхэр ащыухъумэгъэнхэм, чIыопсым икъэ­кIуапIэу псауныгъэмкIэ зишIуагъэ къакIохэрэм ыкIи IэзэпIэ­зыгъэпсэфыпIэ чIыпIэхэм, Iоф­­шIапIэхэм ябэдзэршIыпIэ, чIыпIэ зыгъэIорышIэжьыпIэхэм япшъэрылъхэм, гъэсэныгъэм афэгъэхьыгъэ шъолъыр хэбзэгъэуцугъэхэм зэхъокIыныгъэхэр афэшIыгъэнхэм фэгъэхьыгъэ хэбзэгъэуцугъэхэм, законопроектхэм атегущыIэхи, апэрэ ыкIи ятIонэрэ еджэгъухэмкIэ аштагъэх.

Джащ фэдэу мы зэхэсыгъом Елена Акеньшинар Мые­къуапэ ихьыкум участкэу N-у 8-м изэгъэшIужь судьяу гъэ­нэфэгъэным, Мамрыкъо Людмилэ хьыкумышIхэм яквалификационнэ коллегие хэгъэхьэгъэным щытегущыIэхи, игъоу алъытагъ.

ХЪУТ Нэфсэт.