ХэушъхьафыкIыгъэ дзэ операциеу Украинэм щыкIорэм ежь яшIоигъо­ныгъэкIэ хэлажьэхэрэм Урысые Фе­дерацием и УIэшыгъэ КIуачIэхэм ядзэкъулыкъушIэхэм афэдэу вете­раным истатус ятыгъэным фэгъэхьыгъэ законопроектым Урысыем и Прави­тельствэ дыригъэштагъ. Министрэхэм я Кабинет ипресс-къулыкъу ащ фэ­гъэхьыгъэу къытыгъ.

Мы законопроектым дегъэштэгъэнымкIэ правительствэм зэфэхьысыжьэу ышIыгъэм фэгъэхьыгъэу къытыгъ Урысыем къэбархэмкIэ и Агентствэу «КъэбарыкIэхэр» зыфиIорэм. Правительствэм къызэрэщыхагъэщыгъэмкIэ, хэу­шъхьафыкIыгъэ дзэ операцием хэлажьэхэрэм ащыщхэу уIагъэ хъугъэхэми Iэшэ зэпэуцужьныгъэм сэкъат зэрэхэхъухьагъэхэм истатус яIэ хъуным кIэдэунхэ алъэкIыщт.

Iоныгъом ыкIэхэм адэжь къызэратыгъагъэмкIэ, частичнэ мобилизацием къыхиубытагъэхэу Урысыем щыпсэухэрэм Iэшэ зэIуупIэныгъэхэм яветеран статус яIэн алъэкIыщт, джащ фэдэу фэгъэкIотэныгъэ гъэнэфагъэхэри къафашIыщтых. Мобилизацием къыхиубытагъэхэм социальнэ гарантиехэр яIэщтых, ащ хэхьэх мазэ къэс ахъщэ къаратыныр ыкIи социальнэ фэIо-фэшIэ гъэнэфагъэхэр афызэшIуахынхэр. Джащ фэдэу илъэс 60-м шIокIыгъэхэу Iэшэ зэIуупIэныгъэхэм яветераныцIэ зиIэхэм коммунальнэ фэIо-фашIэхэм атефэрэ ахъщэм нахь къафыщыгъэкIэгъэныр Урысыем къащыхалъхьагъ. Къэралыгъо Думэм идепутатэу Василий Власовым къызэриIуагъэмкIэ, ветеранхэм аныбжь нахь хахъо къэс, IофшIэныр лъагъэ­кIотэнымкIэ амалэу яIэм нахь къыкIечы.