Урысые Федерацием и Федеральнэ ЗэIукIэ ФедерациемкIэ и Совет дэжь щызэхэщэгъэ Советэу Урысые Федерацием ишъолъырхэм гъэстыныпхъэ шхъуантIэр аIэкIэгъэхьэгъэным епхыгъэ Iофыгъохэм афэгъэзагъэм изэхэсыгъо видеозэпхыныгъэ шIыкIэм тетэу тыгъуасэ щыIагъ.

Iофыгъоу зытегущыIагъэхэм ащыщых Адыгэ Республикэм тапэкIи газыр IэкIэгъэхьэгъэным ыкIи газ проектхэр пхырыщыгъэнхэм япхыгъэ Iофыгъохэр. Iофтхьабзэр зэрищагъ Феде­рациемкIэ Советым экономикэ политикэмкIэ икомитет итхьаматэу Андрей Кутеповым.

Советым иIофшIэн хэлэ­жьагъэх ФедерациемкIэ Со­ветым икомитетхэм яIэшъхьэтетхэр, Урысые Федерациеми Президент и Администрацие, Урысые Федерацием и Минэнерго, ПАО-у «Газпромым», пшъэдэкIыжьэу ыхьы­рэмкIэ гъунэпкъэ гъэнэфагъэ зиIэ обществэу «Газпром меж­регионгаз» зыфиIохэрэм ялIыкIохэр, Урысыем ишъолъырхэм япащэхэр. Адыгеим ыцIэкIэ зэхэсыгъом хэлэжьагъ Адыгэ Республикэм и ЛIышъхьэу Къум­пIыл Мурат.

Джащ фэдэу видеоконфе­ренцием хэлэжьагъэх Адыгеим ыцIэкIэ Федерацием и Совет исенаторэу Александр Наро­линыр, Адыгэ Республикэм экономикэ хэхъоныгъэмкIэ ыкIи сатыумкIэ иминистрэу Шэуджэн Заур, пшъэдэкIыжьэу ыхьы­рэмкIэ гъунэпкъэ гъэнэфагъэ зиIэ обществэу «Газпром меж­регионгаз Майкоп» зыфиIорэм игенеральнэ пащэу Игорь Сыр­чиныр.

Андрей Кутеповым къызэриIуагъэмкIэ, Урысыер гурытым­кIэ пштэмэ, газыр аIэкIэ­гъэ­хьэгъэным ылъэныкъокIэ ашъхьадэкIыхэрэм Адыгеир ащыщ.

«Шъолъырым ипащэхэр гуетыныгъэ фыряIэу Iофтхьэбзэ гъэнэфагъэхэм язэшIохын ыуж зихьэхэкIэ, кIэухри псынкIэу нэрылъэгъу къэхъу. Гъэстыныпхъэ шхъуантIэр аIэкIэгъэхьэгъэным ыкIи газ системэр гъэ­кIэжьыгъэным алъэныкъокIэ Адыгеим непэ амал шъхьаIэхэр къыхихынхэ фае. ГазрыкIуапIэхэм зэрахахъорэм къыхэкIэу газ организациехэм хэ­бзэIахьхэу къафэгъэзагъэ хъу­хэрэми ахэхъо. Ащ фэдэу зы­хъурэм, республикэм ипащэхэр адеIэх, мылъкумкIэ хэбзэIахь фэгъэкIотэныгъэхэр афашIых», — къыIуагъ Андрей Куте­повым.

Адыгеим и ЛIышъхьэ къызэ­рэхигъэщыгъэмкIэ, Минэнергомрэ «Газпромымрэ» яшIуагъэ­кIэ республикэм газэу къы­IэкIахьэрэр процент 94,7-м нэсыгъ. ГазгощыпIэ системэм километрэ мини 5 фэдиз еубыты, магистральнэ газрыкIуапIэхэм аубытырэр километрэ 625-рэ фэдиз мэхъу. Газ сетьхэм абонент мини 172,5-рэ апышIагъ. ГазгощыпIэ станцие 27-мэ пшъэрылъ гъэнэфагъэхэр мыщкIэ зэшIуахых. Ау къуаджэу Хьащтыку, къутырэу Новый Садым, псэупIэхэу Яблоновскэмрэ Прикубанскэмрэ, джащ фэдэу къуаджэу Тэхъутэмы­къуае ягазгощыпIи 5-мэ бащэ атегъэкIагъэ хъугъэ.

«Газпромым» ащ фэдэ Iофыгъохэр къызпытэджэгъэ станциехэр зэтыригъэпсыхьа­жьынхэу рихъухьагъ, ау амал зэри­IэкIэ нахьыжьэу а Iофыр зэшIохыгъэ хъумэ нахьышIу. Рес­публикэм анахь псынкIэу хэхъо­ныгъэ щызышIырэ районхэм ястанции 3-мэ (псэупIэхэу При­кубанскэм, Псэкъупсэ, къуа­джэу Хьащтыку) язэ­тегъэ­псыхьан мыщ къыхеубытэ», — къыIуагъ КъумпIыл Мурат.

Республикэм и ЛIышъхьэ агу къызэригъэкIыжьыгъэмкIэ, а Iофыгъор Адыгэ Республикэм и Мафэхэм яхэгъэунэфыкIын тегъэпсыхьагъэу ФедерациемкIэ Советым къыщаIэтыгъагъ. Сенаторхэмрэ «Газпром меж­регионгаз» зыфиIорэм ипащэ­хэмрэ яшIуагъэкIэ, ахэм яIэпы­Iэгъу хэлъэу IофшIэнхэр ра­гъэ­жьагъэх.

Социальнэ газификацием фэгъэхьыгъэу республикэм и ЛIышъхьэ къызэриIуагъэмкIэ, Адыгеим ихэпIэ мини 6,2-м ехъумэ, псэупIи 180-мэ а Iоф­тхьабзэр ащызэшIохыгъэн фае. Газ сетьхэм апашIэн-хэмкIэ унэгъо мини 5,5-рэ фэдизмэ лъэIу тхылъхэр къаты­гъахэх, зэзэгъыныгъэ мини 4-м ехъу адашIыгъах. IэпыIэгъу зэратыщтхэм ащыщых Хэгъэгу зэошхом сэкъатныгъэ хэзы­хыгъэхэр ыкIи ащ хэлэжьа­гъэхэр, а 1-рэ ыкIи я 2-рэ купхэм ахэхьэрэ сэкъатныгъэ зиIэхэр, гъот макIэ зиIэ уна­гъохэр. Урысые Федерацием и Президент пшъэрылъ къы­зэрафишIыгъэм тетэу а купхэм аратыщтыгъэр сомэ мин 50 хъущтыгъэмэ, джы сомэ мини 100-м нагъэсыгъ. А Iо­фыгъохэм ыкIи нэмыкIхэу зэшIуахыхэрэм яшIуагъэкIэ 2025-рэ илъэсым ыкIэм ехъулIэу республикэм процент 97-м нэсэу газыр щаIэкIагъэхьащт.

ХэушъхьафыкIыгъэу мы зэ­хэсыгъом хэлажьэхэрэр зытегущыIагъэхэр проекти 2-мэ язэшIохын. Ар зыфэгъэхьыгъэр Адыгеим станциякIэхэр щыгъэ­псыгъэнхэр, «Новый Сад» зыфиIорэмрэ «Индустриальнэ паркымрэ» газыр аIэкIэгъэ­хьэгъэныр ары. 2023-рэ илъэсым ыкIэм ехъулIэу псэолъа­кIэхэр атыщтых.

Минэнергомрэ «Газпром межрегионгаз» зыфиIорэмрэ къызэрэхагъэщыгъэмкIэ, Адыге­ир гъэстыныпхъэ шхъуантIэр аIэкIэгъэхьэгъэным ылъэныкъо­кIэ анахь гъэхъэгъэ инхэр зы­шIыгъэхэм зэращыщым имыза­къоу, газым ыпкIэ тыгъэнымкIи щыкIэгъабэ иIэу щытэп. ЧIы­фэхэмкIэ графикри агъэцакIэ.

Ащ дакIоу республикэм игъо къыфалъэгъугъ социальнэ га­зификацием тегъэпсыхьагъэу джыри нэмыкI унагъохэм газыр зэраIэкIахьэрэм ипсын­кIагъэ нахь хагъэхъонэу. Адыге­им и ЛIышъхьэ ыгъэгугъагъэх республикэм ихэбзэ къулыкъу­хэм пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межре­гионгаз Майкоп» зыфиIорэр ягъусэу мы лъэныкъомкIэ Iоф­тхьэбзэ гъэнэфагъэхэр зэшIуа­хынхэу.

АР-м и ЛIышъхьэ ипресс-къулыкъу Сурэтхэр А. Гусевым тырихыгъэх.