Адыгеим и ЛIышъхьэу КъумпIыл Мурат псэупIэу Родни­ковэм зыщэIэм ыкIи ащ щыпсэухэрэм задэгущыIэм, Iофыгъо зэмлIэужыгъохэмкIэ пшъэрылъхэр къы­гъэнэфэ­гъагъэх.

[caption id="attachment_121965" align="aligncenter" width="800"]  [/caption]

ПсэупIэм щыIакIэу дэлъыр нахьышIу шIы­гъэным ахэр тегъэпсы­хьагъэх. Республикэм ипащэ иунашъокIэ «псау­ныгъэм имэшIоку» Родниковэм еблэгъагъ. Iоф­тхьабзэр зыфэгъэхьы­гъэр медицинэ IэпыIэгъу лъэныкъо зэфэшъхьафхэмкIэ цIыфхэм ягъэгъотыгъэныр ары. «МэшIокум» хэхьэх агъэ­кощырэ фельдшер-ма­мыку IэзапIэр, флюорографыр, маммографыр, джащ фэдэу терапевтыр, неврологыр, мамыку-гинекологыр, кIэлэцIыкIу­хэм яIэзэрэ врачыр.

— «Псауныгъэм имэшIоку» къыхеубытэ цIыф­хэм япсауныгъэ иуплъэ­кIун, лъым хэлъ шъоущыгъур зыфэдизым изэ­гъэшIэн, лъыдэкIуаем ыкIи жьым яшын. Уплъэ­кIунхэм ауж врачхэр цIыфхэм упчIэжьэгъу афэхъущтых, псауныгъэм изэтегъэуцожьынкIэ зэ­рэзекIонхэ фаер агурагъэIощт. Джащ фэдэу COVID-19-м щызыухъу­мэщтхэ вакцинэхэми яхэлъхьан Iофыгъом къы­дыхэлъытагъ, — ­къеты АР-м псауны­гъэр къэухъумэгъэнымкIэ и Министерствэ.

Шъугу къэдгъэкIы­жьын, джащ фэдэу рес­публикэм щырагъэкIокIы Iофтхьабзэу «Добро в село» зыфиIоу лъэпкъ проектэу «Псауныгъэм икъэухъумэн» къыдыхэлъытагъэр. Псэу­пIэ чыжьэхэм адэсхэм медицинэ фэIо-фа­шIэхэр лъэныкъо зэ­фэшъхьафхэмкIэ аIэ­кIэгъэхьэгъэнхэм ари тегъэпсыхьагъ. Аужырэ мэзиблым республикэм ипсэупIэ 27-мэ адэс нэбгырэ 650-м ехъумэ мы Iофтхьабзэм къы­хиубытэу IэпыIэгъу арагъэгъотыгъ.