Хьыкум приставхэм я Федеральнэ къулыкъу Адыгэ РеспубликэмкIэ и ГъэIорышIапIэ иIофышIэу Ирина Миш­ки­нар Мыекъуапэ дэт гурыт еджапIэу N 17-м иапэрэ класс икIэлэеджакIохэм мы мафэхэм аIукIагъ.

Iофтхьабзэм кIэщакIо фэхъугъэр ежь гъэсэныгъэ учреждениер ары ыкIи кIэлэцIыкIухэу спортым пыщагъэхэм япчъагъэ нахьыбэ хъуным ар фэIорышIэ. Иринэ гандболымкIэ спортым имастер, зэнэкъокъу зэфэшъхьафхэм текIоныгъэ ыкIи хагъэу­нэфыкIырэ чIыпIэхэр гъогогъу пчъа­гъэрэ къащыдихыгъ.

Иринэ кIэлэеджакIохэм къафиIотагъ спортым пыщагъэ зэрэхъугъэр, анахьэу баскетболыр ыкIи гандболыр ыгу зыкIырихьыхэрэр. Джащ фэдэу опытэу IэкIэлъымкIэ кIэлэцIыкIухэм адэгощагъ, гъэхъагъэхэр пшIынхэм фэшI ухьазырыныгъэ гъэнэфагъэ уиIэн зэрэфаем дакIоу, дэгъоу уеджэными мэхьанэшхо зэриIэр хигъэунэфыкIыгъ.

Непэ хьыкум приставэу Iоф зы­шIэрэ Ирина Мишкинам илъэс зэкIэ­лъыкIохэм медалэу къыфагъэшъо­шагъэхэр, зэнэкъокъухэм япхыгъэу зыдэкIогъэ чIыпIэхэр ары анахьэу кIэлэцIыкIухэм ашIогъэшIэгъоныгъэр. ШIуагъэ къэзытырэ мыщ фэдэ Iофтхьабзэхэр тапэкIи зэхащэнхэу еджапIэмрэ хьыкум приставхэмрэ зэдаштагъ.

Хьыкум приставхэм я Федеральнэ къулыкъу

АдыгеимкIэ и ГъэIорышIапIэ ипресс-къулыкъу.