Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновыр Адыгеим къэ­кIуагъ. АР-мрэ Краснодар краимрэ ащыпсэухэу мобилизацием къы­хиубытагъэхэм Iоф зарадашIэрэр ащ ыуплъэкIугъ.

Владимир Устиновыр Адыгеим и ЛIышъхьэу КъумпIыл Му­ратрэ Краснодар краим игубернаторэу Вениамин Кондратьевымрэ ягъусэу мобилизацием къыхырагъэубытэщтхэм яIоф­хэмкIэ Гупчэм щыIагъ.

Краснодар иапшъэрэ дзэ училищэ ипащэу Игорь Шпырня дзэ къулыкъум ащэхэрэм Iэшэ­-шъуашэу къаратырэр ахэм къаригъэлъэгъугъ. Мобилиза­ци­ем къыхиубытагъэхэм дзэ Iэшэ­-шъуашэхэм анэмыкIэу хьа­шъо щазымэ фабэхэри, плащ­хэри, нэмыкI пкъыгъохэри къа­ратых.

Владимир Устиновым къызэрэхигъэщыгъэмкIэ, дзэкIолIхэм къаратырэ шъуашэхэр дэгъунхэ, шэпхъэ инхэм адиштэнхэ фае.

УФ-м и Президент и Полномочнэ лIыкIоу Къыблэ федеральнэ шъолъырым щыIэр, Адыгеимрэ Пшызэ шъолъы­рырэ япащэхэр, дзэкIолIхэр зэрагъа­сэхэрэм алъыплъагъэх, шхапIэм­рэ медицинэ IэзапIэмрэ Iоф зэрашIэрэм зыщагъэгъозагъ.

Владимир Устиновым мобилизацием къыхырагъэубытагъэ­хэм зэIукIэгъу адыриIагъ. Ащ дзэкIолIхэм яIофхэр зэпыфэнхэу, псаухэу ядэжь къагъэзэ­жьынэу афэлъэIуагъ.

«Шъуятэжъхэу, шъуятэжъ пIа­шъэхэу дунаим ианахь къэралыгъошхоу щыт джырэ Урысыем итекIоныгъэхэм зиIахь хэзышIыхьагъэхэм шъуарыгушху. Непэ тицIыфхэр къэшъуухъу­мэнхэу шъокIо. ШъуиIофхэр зэ­пыфэнэу сышъуфэлъаIо. Тэ сыдигъуи IэпыIэгъу тыкъышъу­фэхъущт. ЗэшIомыхыгъэ Iофыгъо горэхэр шъуиIэмэ къытфэшъутх. Ахэм язэшIохынкIэ ищы­кIэгъэ амалхэр зэкIэ зетхьащтых», — къыIуагъ Полномочнэ лIыкIом.

АР-м и ЛIышъхьэу КъумпIыл Мурати дзэкIолIхэм гущыIэ фабэхэр ариIуагъ.

«ХэушъхьафыкIыгъэ операциер зэрэкIорэр тэлъэгъу — зэкIэри зыфэкIожьырэр тидзэ къулыкъушIэхэр хэмыкIодэнхэр ары. Анахь шъхьаIэр — хэгъэгум и Президент къыгъэуцугъэ пшъэрылъхэр гъэхъагъэ хэлъэу гъэцэкIэгъэнхэр, шъупсаоу, шъуузынчъэу шъуадэжь къэжъугъэзэжьыныр ары. Хэбзэ къулыкъу­хэм типшъэрылъыр шъуи­унагъохэм IэпыIэгъу тафэ­хъуныр, тидзэкIолIхэм та­фэгумэкIыныр ары. АщкIэ зэкIэ ищыкIагъэр тшIэщт», — къыIуагъ республикэм ипащэ.

Нэужым Мыекъуапэ ия 237-рэ артиллерийскэ бригадэ зыдэщыт чIыпIэм щы­Iагъэх. Владимир Устиновым, КъумпIыл Мурат, Ве­ниамин Кондратьевым дзэ къулыкъум ащагъэхэм щы­IэкIэ-псэукIэ амалэу яIэхэм защагъэгъозагъ, Краснодар иапшъэрэ дзэ училищэ художественнэ самодеятельностымкIэ икуп икъэгъэлъэ­гъон еплъыгъэх.

Джащ фэдэу ахэр Мые­къопэ районым ит щэрыуа­пIэми щыIагъэх. Мобилизацием къыхырагъэубыта­гъэ­хэм мыщ Iашэ зэфэшъхьаф­хэр зэрэбгъэфедэщт шIыкIэм щыфагъасэх. Ахэр па­лат­кэхэм ащэпсэух. ЯIа­хьылхэм адэгущыIэнхэмкIэ интернет-зэпхыныгъэм ­иамал ухъумагъэхэр дзэкIолI­хэм къызфагъэфедэх.

АР-м и ЛIышъхьэ ипресс-къулыкъу Сурэтхэр А. Гусевым ты­рихыгъэх.