Мобилизацием хэфагъэхэм ащыщ нэбгырэ 30 зэрагъэ­кIо­тагъэхэм фэгъэхьыгъэ Iоф­тхьа­бзэ тыгъуасэ АР-м идзэ комиссариат щыкIуагъ.

Ащ хэлэжьагъэх АР-м и ЛIы­шъхьэрэ министрэхэм я Кабинетрэ я Администрацие ипащэу Владимир Свеженец, АР-м идзэ комиссарэу Александр Авериныр, Мыекъопэ къэлэ администрацием ипащэ игуадзэу, ветеранхэм якъэлэ Совет итхьаматэу Юрий Томчак, динлэжьхэр, дзэкIолIхэм ягу­псэхэр.

Владимир Свеженец къэзэрэугъоигъэхэм пэублэ пса­лъэкIэ закъыфигъэзагъ. Мобилизацием хэфагъэхэм язичэзыу куп непэ зэрагъэкIуатэрэр, къэ­ралыгъо хэбзэ къылыкъухэм ахэми, яунагъохэми анаIэ зэратетыщтыр къыхигъэщыгъ.

— Хэгъэгур зэрифэшъуашэу къэшъуухъумэным фэшI дзэ Iо­фымкIэ шIэныгъэу шъуIэкIэлъхэм зыщахэжъугъэхъон шъу­лъэ­кIыщт подразделением шъуа­щэщт. Арышъ, къэжъугъэ­нэрэ унагъохэм шъуакъыфэмыгумэкI. Адыгеим и ЛIышъхьэу КъумпIыл Мурат ипшъэрылъкIэ тыкъэ­кIуагъ гумэкIыгъоу шъуи­Iэхэр зэкIэ зэдгъэшIэнхэу. Ахэр зэшIо­хыгъэнхэм ыуж титыщт, ищыкIэгъэ IэпыIэгъур шъодгъэгъотыщт, — хигъэунэфыкIыгъ ащ.

ГущыIэр лъигъэкIотагъ АР-м идзэ комиссарэу Александр Авериным.

— Илъэси 2 — 3-кIэ узэкIэIэ­бэжьымэ, мыщ фэдэ гумэкIыгъо тыхэтыныр хэти ышIагъэп. Ау ткъошхэу чIыпIэ къин ифагъэхэм тадеIэн фаеу хъугъэ. Непэ гъогу техьащт дзэкIолIхэр зыдащэщтхэр тымышIэу щытэп, ахэр инженернэ полкэу Волгоград пэмычыжьэу щыIэм яIэпэIэсэныгъэ щыхагъэхъощт, нэ­ужым хэушъхьафыкIыгъэ дзэ операцием хэлэжьэщтых, — къы­Iуагъ ащ.

Iофтхьабзэм къыщыгущыIэгъэ пстэуми УФ-м и Президентэу Владимир Путиным пшъэрылъэу къыгъэуцугъэхэр тидзэ­кIолIхэм агъэцэкIэнхэшъ, псаоу, узынчъэ­хэу къагъэзэжьыныр анахь шъхьаIэу хагъэунэфы­кIыгъ. Тхьэм ынэшIу къащыфэ­нэу динлэжьхэр къафэлъэIуа­гъэх. Ягупсэхэр, ябынхэр къызэряжэхэрэр зыщамыгъэгъуп­шэнэу зафагъэзагъ.

Iэшъынэ Сусан.