Урысые Банкым и Къутамэу АР-м щыIэм зэригъэунэ­фы­гъэмкIэ, Адыгеим гъомылапхъэхэм ауасэ, шы­шъхьэIу мазэм зыфэдизыгъэм егъэпшагъэмэ, процент 14,3-кIэ е-хыгъ.

ХэтэрыкIэу ыкIи пхъэ­шъхьэ-мышъхьэу респуб­ликэм къыщаугъоирэм, гъунэгъу субъектхэм къаращырэм зэрэхэ­хъуагъэр ары ушъхьагъу шъхьаIэу къыхагъэщырэр. Картофым, мыIэ­рысэм, нэшэбэгум ауасэ ехыгъэу, помидорымрэ бжьынымрэ макIэу ахэхъуагъэу ары къызэратхырэр.

Гъомылапхъэхэм ­ауасэ зэхъокIыныгъэу фэхъухэрэм былымхъуным пылъхэми яIахь хэлъ. Адыгеим чэтхъуным зыщеушъомбгъу, гъунэгъу шъолъырхэм къолэу къаращырэр на­хьыбэ хъугъэ. Къэралыгъо IэпыIэгъум, анахьэу былымIусхэм апае фэгъэкIотэнхэр къыздэлъы­тэгъэ кредитэу къаты­хэрэм ишIуагъэкIэ мэкъумэщышIэхэм гъомылапхъэу бэдзэршIыпIэм къырагъэуалIэрэм хэ­хъуагъ. Ащ къыхэкIэу чэтылым, къолым ауасэ зэрэдэкIуаерэр къызэтеуцуагъ.

Адыгеим инфляциер мэзитф хъугъэу къыще­Iыхэу Урысые Банкым и Къутамэу АР-м щыIэм къеты. Iоныгъо мазэм ар процент 14,6-рэ хъущтыгъ. Урысые Банкым прогнозэу къышIыгъэмкIэ, 2022-рэ илъэсым инфляциер процент 11 — 13-м шIокIыщтэп. Мылъку-кредит политикэу къэралыгъом щыпхыращырэр къыдилъы­тэзэ, 2023-рэ илъэсым ар проценти 5 — 7-м, 2024-м — проценти 4-м нэсэу къеIыхыжьыщтэу ары къызэритыгъэр.