Хьыкум приставхэм къаты
ЦIыфхэм упчIэжьэгъу афэхъугъ
Хьыкум приставхэм я Федеральнэ къулыкъу Адыгэ РеспубликэмкIэ и ГъэIорышIапIэ ипащэу Александр Ихно сэкъатныгъэ зиIэхэм мы мафэхэм аIукIагъ.
Къэзэрэугъоигъэхэр зыгъэгумэкIырэ Iофыгъохэм защигъэгъозагъ, упчIэжьэгъу афэхъугъ. Джащ фэдэу яупчIэхэм джэуапхэр къаритыжьыгъ.
Александр Ихно ведомствэм ипшъэрылъхэр зэригъэцакIэрэм къытегущыIагъ, къулыкъум иIофшIэн зэхъокIыныгъэу фэхъугъэхэм, хьыкум приставхэм непэ анахьэу анаIэ зытырагъэтырэ лъэныкъохэм къащыуцугъ.
Тазыр 80-м ехъу къырагъэпщыныгъ
Теуцожь районым щыпсэурэ хъулъфыгъэм гъогурыкIоным ишапхъэхэр пчъагъэрэ ыукъуагъэх ыкIи ащ къыхэкIэу тазыр 80-м ехъу къытыралъхьагъэу щытыгъ.
Хэбзэгъэуцугъэу щыIэм диштэу мыщ ылъэныкъокIэ хьыкум приставым Iофхэр къызэIуихыгъэх. Хъулъфыгъэм сомэ мин 45-м ехъу къыпщыныжьын зэрэфаер, ар зимыгъэцакIэкIэ пшъэдэкIыжьыр зэрагъэлъэшыщтыр гуригъэIуагъ.
Ау хьыкум приставым къыIуагъэм ар едэIугъэп, игъом ахъщэр къызэкIигъэкIожьыгъэп. Ащ къыхэкIыкIэ къулыкъушIэм хьыкумым зыфигъэзагъ. Ащ ыуж ныIэп Iофыр нахь къин зэрэхъущтыр хъулъфыгъэм къызыгурыIуагъэр ыкIи тазырхэр къызипщыныгъэр.
Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.