Зыныбжь хэкIотагъэхэм Iоф адэшIэгъэнымкIэ проектхэм я Урысые зэнэкъокъу текIоныгъэ къыщыдэзыхыгъэхэм «Единэ Россием» шIухьафтынхэр аритыжьыгъэх.

ЗэкIэмкIи зэнэкъокъум проект 796-рэ къырахьылIагъ, проекти 8-мэ грантхэр ара­тыгъ. Партпроектэу «ЛIэуж нахьыжъ» зыфиIорэм ифедеральнэ координаторэу, ФедерациемкIэ Советым ипащэ игуадзэу Галина Кареловам къызэриIуагъэмкIэ, зэнэкъокъум цIы­фыбэ зэрэхэлэжьагъэм къеу­шыхьаты зы­ныбжь хэкIотагъэхэр зыщыпсэухэрэ хэгъэгум ищыIакIэ чанэу хэлажьэхэ, яшIуагъэ къагъакIо зэрашIои­гъор.

— Урысые Федерацием и Президент, УФ-м и Правительствэ, партиеу «Единэ Россием» зыныбжь хэкIотагъэхэм ящыIэкIэ-псэукIэ нахьышIу шIыгъэным, ягумэкIыгъохэр зэшIохыгъэнхэм мэхьэнэ ин раты. Федеральнэ программэу «ЛIэуж нахьыжъ» зыфиIорэр щыIэныгъэм щыпхыращы, социальнэ фэIо-фашIэхэр зыщызэшIуахырэ гупчэхэр бэу къызэIуахых, — къыIуагъ ащ.

Проектым изы Iахьэу «Бэгъэ­шIэныр зэкIэмэ апае» зыфи­Iорэм ипащэу, Къэралыгъо Думэм идепутатэу Екатерина Стенякинам «Единэ Россием» зэхищэгъэ зэнэкъокъур зэрэлъа­гъэкIотэщтыр къыIуагъ.

Джащ фэдэу «тыжьын» волонтерствэм зырагъэушъомбгъу­нымкIэ «Единэ Россием» IофшIэнышхо зэрэзэшIуихырэр къыхигъэщыгъ УФ-м IофшIэнымкIэ ыкIи социальнэ хэхъоныгъэмкIэ министрэм игуадзэу Ольга Баталинам.

— «Единэ Россием» непэ къыхихыгъэ анахь проект дэ­гъухэм грантхэр афагъэшъо­шэщтых. Проект гъэшIэгъоныбэ ахэт, ахэм шъолъырхэм ащыпсэурэ нахьыжъхэм Iоф­тхьэбзэ зэфэшъхьафэу афызэхащэн алъэкIыщтхэр къащыраIотыкIых. «Единэ Россием» зыныбжь хэкIотагъэхэм япхыгъэ Iофыгъоу зэшIуихыхэрэм мыщ фэдэ лъэныкъо къызэрахэхьагъэм шIогъэ ин пылъ. УФ-м IофшIэнымкIэ ыкIи социальнэ хэхъоныгъэмкIэ и Министерствэ ахэм IэпыIэгъу афэхъуным фэхьазыр, — къы­Iуагъ ащ.

Апэрэ чIыпIэр къыдэзыхыгъэ проектым грантэу сомэ мин 300, ятIонэрэм — сомэ мин 200, ящэнэрэм — 150-рэ афагъэ­шъошагъэх.

Партиеу «Единэ Россием» и Генсовет, Мыекъуапэ инароднэ депутатхэм я Совет ахэтэу, проектэу «ЛIэуж нахьыжъ» зыфиIорэм АдыгеимкIэ икоординаторэу Бэрзэдж Асиет къызэри­IуагъэмкIэ, 2018-рэ илъэсым къыщегъэжьагъэу нахьыжъхэм ателъытагъэу «тыжьын» волонтерствэм ишъолъыр гупчэ Адыгеим щэлажьэ.

— «Тыжьын» волонтерствэм хэхъоныгъэхэр ышIынхэмкIэ мыщ фэдэ зэнэкъокъухэм яшIуагъэ къэкIо. Зыныбжь хэкIотагъэхэм яуахътэ гъэшIэгъонэу агъэкIонымкIэ, волонтер IофшIэным пыщагъэ хъун­хэмкIэ мыщ мэхьэнэ ин иI, — къыIуагъ ащ.

Зыныбжь хэкIотагъэхэм яуахъ­тэ гъэшIэгъонэу зыща­гъэкIощт шъолъыр инфраструктурэм хэхъоныгъэхэр ышIынхэм ыкIи «тыжьын ныбжьым» ит цIыфхэм Iоф адэшIэгъэным япхыгъэ уп­чIэхэр зэхафынхэр ары пшъэ­рылъ шъхьаIэу зэхэщакIохэм зыфагъэуцужьырэр.