Сэнаущыгъэ зыхэлъхэр къыхэгъэщыгъэнхэм фэшI
Мы мафэхэм Адыгэ къэралыгъо университетым я IV-рэ Урысые конференциеу «Математический талант и математическое образование» зыфиIорэр щыкIуагъ. Адыгеир къэралыгъо гъэпсыкIэ иIэу зыщыIэр илъэси 100 зэрэхъугъэм ыкIи хьисапыр нахь игъэкIотыгъэу зэзыгъашIэ зышIоигъо кIэлэеджакIохэр, студентхэр къыхэгъэщыгъэнхэм, ахэм IэпыIэгъу афэхъугъэным ар фэгъэхьыгъагъ. Iофтхьабзэм хьисапым хэшIыкI ин фызиIэ кIэлэеджакIохэм Iоф адэзышIэрэ специалистхэр, математик цIэрыIохэр, хьисапымкIэ Урысыем ихэшыпыкIыгъэ командэ итренерхэр хэлэжьагъэх.
Конференцием хэлэжьагъ АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Константин Лебедевыр. Iофтхьабзэм къекIолIагъэхэм ащ шIуфэс къарихыгъ ыкIи АР-м и ЛIышъхьэ ыцIэкIэ хьисапымкIэ Урысыем икомандэ итренер шъхьаIэу, АКъУ-м иIофышIэу Кирилл Суховым щытхъу тхылъ ритыжьыгъ.
Iофтхьабзэр къызэIуихыгъ Адыгэ къэралыгъо университетым иректорэу Мамый Даутэ. Ащ къызэриIуагъэмкIэ, сэнаущыгъэ ин зыхэлъ кIэлэцIыкIухэм ыкIи ныбжьыкIэхэм Iоф адэшIэгъэным апшъэрэ еджапIэм мэхьанэшхо реты. АКъУ-м зэхищэрэ проектхэм къэралыгъо 16-мэ ыкIи УФ-м ишъолъыр 50-мэ ащыщ кIэлэеджакIохэр ыкIи студентхэр ахэлажьэх. Хьисапым фэщэгъэ ныбжьыкIэхэр къыхэгъэщыгъэнхэм ыкIи IэпыIэгъу афэхъугъэным афэшI «Растим новых Лобачевских» зыфиIорэ проектыр апшъэрэ еджапIэм зэхищагъ.
— Сэнаущыгъэ ин зыхэлъ ныбжьыкIэхэм Iоф адэшIэгъэнымкIэ хэушъхьэфыкIыгъэ системэ щыI. ЫпэрапшIэу хьисапымкIэ Урысые олимпиадэхэм кIэлэеджэкIо миллион фэдиз ахэлажьэ, уцугъохэм зэкIэми апхырыкIырэр нэбгырэ мин 50, нэужым ахэм нахь игъэкIотыгъэу Iоф адашIэ. Ащ шIогъэ гъэнэфагъэ пылъ, ау джырэ уахътэм диштэрэ экономикэр гъэпсыгъэнымкIэ ахэм афэдэ специалистхэр фэдипшIыкIэ нахьыбэу тищыкIагъэх ыкIи ахэр зэримыкъухэрэр гумэкIыгъо шъхьаIэхэм ащыщ, ащ исистемэ зэблэхъугъэным тыдэлажьэ, — къыIуагъ ректорым.
БэмышIэу АКъУ-м хьисапымкIэ лабораторие къыщызэIуахыгъ. ХэгъэгумкIэ апэрэ шIэныгъэ лабораториеу ар щыт. Джащ фэдэу мы лъэныкъомкIэ апшъэрэ еджапIэр шIэныгъэ-гъэсэныгъэ проект пчъагъэмэ якIэщакIу. Ахэм ахэт Дунэе Кавказ хьисап олимпиадэр, Гъэмэфэ хьисап еджапIэр, студент еджапIэу «Современная комбинаторика и теория игр» зыфиIорэр, Урысые кIэлэцIыкIу гупчэу «Орленкэм» щызэхащэрэ Урысые сменэу «Юный математик» зыфиIорэр, хьисапымкIэ кIэлэегъаджэхэм апае зэхащэрэ семинархэр ыкIи нэмыкIхэр.
Урысые конференциеу «Математический талант и математическое образование» зыфиIорэр 2018-рэ илъэсым къыщегъэжьагъэу Адыгэ къэралыгъо университетым щызэхащэ.