Новороссийскэ иполигонэу «Раевскэм» хэушъхьафыкIыгъэ дзэ операцием хэлэжьэщт къэзэкъ-гуфакIохэр щагъэкIотагъэх.

ЕджэпIэ-зыгъэсапIэ полигоным къыщызэIуахыгъ. Iашэр зэрагъэфедэщтым, ухъумэн Iофыгъохэр зэрагъэцэкIэщтхэм, щэрыоным, апэрэ IэпыIэгъур уIагъэм зэрэратыщтым, нэмыкIхэм къэзэкъ-гуфакIохэр афагъэсагъэх. Лагъымэр къызэрагъэощтыр, фэшъхьафхэм яхьылIэгъэ Iофыгъохэр къафаIотагъэх.

Мыекъуапэ икъэзэкъ отдел игуфэкIо 30 Пшызэ иотрядэу «Барс 11-м» хагъэхьагъ. Каменномостскэм щыщэу Андрей Моисеевыр купым ипащэу агъэнэфагъ. Мыекъопэ районым икъэзэкъхэм яобществэ ипащэу Юрий Лагошэ къэзэкъ-гуфакIохэм япшъэрылъхэр дэгъоу агъэцэкIэнхэу, къулыкъум IэпыIэгъу щызэфэхъунхэу, текIоныгъэр къыдахыгъэу ядэжьхэм къагъэзэжьынэу афиIуагъ.

Къэзэкъ-гуфакIохэм апае ансамблэм патриотическэ орэдхэр къыIуагъэх, пщынэмкIэ орэдышъор агъэжъынчыгъ.

Екатерина Загорулько. Мыекъуапэ икъэзэкъхэм яотдел ипащэ игуадз.

 ЕмтIылъ Нурбый.