Комиссием изэхэсыгъу
Гъогухэм щынэгъончъэу ащызекIонхэмкIэ Адыгэ Республикэм икомиссие изэхэсыгъо тыгъуасэ АР-м и Правительствэ зычIэт унэм щыкIуагъ. Адыгеим и ЛIышъхьэу КъумпIыл Мурат пшъэрылъ къызэрэфишIыгъэм тетэу АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур ар зэрищагъ.
Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м ифедеральнэ инспектор шъхьаIэу Сергей Дрокиныр, АР-м и МВД, ипрокуратурэ, и МЧС, имуниципалитетхэм япащэхэр.
Мы илъэсым иапэрэ мэзибгъу республикэм игъогухэм тхьамыкIагъоу атехъухьагъэм фэгъэхьыгъэ къэбарым зэхэсыгъом щедэIугъэх. АР-м и МВД ГИБДД-мкIэ и ГъэIорышIапIэ ипащэ ипшъэрылъхэр зыгъэцэкIэрэ Хъунэго Махьмуд къызэриIуагъэмкIэ, гъэрекIорэм егъэпшагъэмэ, мыгъэ республикэм игъогухэм атехъухьэгъэ тхьамыкIагъохэм ахэкIодагъэр нахь макI.
Анахьэу тхьамыкIагъохэр зыпкъ къикIыгъэхэр гъогурыкIонымкIэ шапхъэхэр рульхэм аIусхэми лъэсрыкIохэми зэраукъуагъэхэр ары. Гъогухэм щынэгъончъэу ащызекIонхэмкIэ Адыгеим щызэрахьэрэ Iофтхьабзэхэм комиссием хэтхэр атегущыIагъэх. ГущыIэм пае, лъэпкъ проектхэм къадыхэлъытагъэу автомобиль гъогухэр агъэпсых, агъэцэкIэжьых, урамхэм нэфрыгъуазэхэр, камерэхэр атырагъэуцох.
АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур зэхэсыгъом зэрэщыхигъэунэфыкIыгъэмкIэ, пэшIорыгъэшъ Iофтхьабзэхэм лъэшэу анаIэ атырагъэтын фае.
«Адыгэ Республикэм игъогухэм атехъухьэрэ тхьамыкIагъохэм къащыгъэкIэгъэнэу республикэм и ЛIышъхьэу КъумпIыл Мурат пшъэрылъ къыгъэуцугъ. Ащ пае яцIыкIугъом къыщегъэжьагъэу сабыйхэр шапхъэхэм афэгъэсэгъэнхэ фае. Мы лъэныкъомкIэ муниципалитетхэм япащэхэми загъэчанын фае», — къыIуагъ КIэрэщэ Анзаур.
Гъогухэм яIыгъын фэгъэзэгъэ къулыкъухэр кIымафэм зэрэфэхьазырхэми зэхэсыгъом шъхьафэу щытегущыIагъэх. Мыекъуапэ имэрэу Геннадий Митрофановым къызэриIуагъэмкIэ, техникэ 24-мэ кIымафэм къалэм игъогухэр аукъэбзыщтых. Гъогухэм атыратэкъощт пшэхъо тонн 5000-рэ щыгъу тонн 1000-м ехъурэ зэрагъэуIугъ.
Гъогухэм щынэгъончъэу ащызекIонхэм фытегъэпсыхьэгъэ техническэ амалхэр мэшIокугъогу зэпырыкIыпIэхэм ащыгъэуцугъэн зэрэфаеми игугъу зэхэсыгъом щашIыгъ.
АР-м и ЛIышъхьэ ипресс-къулыкъу