Лъэпкъ проектэу «Псауныгъэр къэухъумэгъэныр» зыфиIорэм къыды­хэ­лъытагъэу псауныгъэм икъэухъумэнкIэ пэублэ звенэкIэ заджэхэрэр гъэкIэжьыгъэным фытегъэпсыхьэгъэ шъолъыр программэр гъэцэкIагъэ зэрэхъурэм ишIуагъэкIэ 2021-рэ илъэсым республикэм икъэлэ шъхьаIэ имикрорайонэу Восходым поликлиникакIэм ишIын щырагъэжьэгъагъ.

УнакIэм терапевтхэм якабинетхэм ямызакъоу, зэкIэ специалистхэу ищыкIагъэхэм атегъэпсыхьэгъэ унэхэр хэтыщтых. Адыгэ Республикэм псауныгъэр къэухъумэгъэнымкIэ и Министерствэ къы­зэрэщаIуагъэмкIэ, а поликлиникэм ишIуагъэкIэ цIыфхэм медицинэ фэIо-фашIэхэу аIэкIагъахьэхэрэр хэпшIыкIэу нахьышIу хъущтых, чэзыум зэрежэхэрэ уахътэми нахь къыкIичыщт.

Унэм ышъхьэ аIэтыгъах, унэ кIоцI IофшIэнхэр лъэкIуатэх, шъхьаныгъупчъэхэм яхэгъэуцон макIо. ПоликлиникакIэр джырэ уахътэм къыгъэуцурэ пшъэрылъ пстэуми адиштэу щытыщт. Джащ фэдэу мы медицинэ учреждением мебелэу ыкIи медицинэ Iэмэ-псымэу ищыкIэгъэщтыр зэкIэ къащэфыщт.

АР-м и ЛIышъхьэ ипресс-къулыкъу