КIэлэцIыкIухэу илъэси 3-м къыщегъэжьагъэу 7-м нэс зыныбжьхэм мазэ къэс къаратырэ, джащ фэдэу къэхъурэ ящэнэрэ кIэлэцIыкIум е ащ къыкIэлъыкIуагъэхэм аныбжь илъэсищ охъуфэ аIэкIагъэхьащт ахъщэмкIэ федеральнэ мылъку тедзэу шъолъырхэм атырагощагъэр Урысые Федерацием и Правительствэ ыухэсыгъ.

Адыгэ Республикэм илъэси 3-м къыщыублагъэу илъэси 7-м нэс зыныбжь кIэлэцIыкIухэм мазэ къэс аратынэу сомэ миллиони 6 фэдиз къыфыхагъэкIыгъ. 2022-рэ илъэсымкIэ федеральнэ бюджетым ехьылIэгъэ законым къыдилъы­тэрэ мылъкум тегъэпсыхьагъэу мы илъэсым сомэ миллиард 1,45-рэ фэдиз федеральнэ IэпыIэгъоу Адыгеим а гу­хэлъхэм апае къыIэкIэхьащт. Ящэнэрэ кIэлэцIыкIур е ащ къыкIэлъыкIохэрэр къызыхъухэкIэ, ахэм апэIуагъэхьанэу сомэ миллион 58,1-рэ республикэм къыфатIупщыгъ. Зэхэубытагъэу къэпIон хъумэ, федеральнэ IэпыIэгъур сомэ миллион 357,1-рэ фэдиз хъущт.

Адыгеим и ЛIышъхьэ агу къызэригъэ­кIыжьыгъэмкIэ, Урысые Федерацием и Президентэу Владимир Путиным и УказкIэ ащ фэдэ къэралыгъо IэпыIэгъур агъэнэфагъ, лъэпкъ проектэу «Демографием» къыдилъытэрэ анахь мэхьанэ зиIэ лъэныкъохэм ар ащыщ. КъумпIыл Мурат къызэриIуагъэмкIэ, кIэлэцIыкIу­хэр зэрыс унагъохэм IэпыIэгъу ятыгъэнымкIэ ащ фэдэ Iофтхьабзэхэм мэхьанэшхо яI, арышъ, ахэр гъэцэкIагъэ зэрэхъу­хэрэм пхъашэу лъыплъэгъэн фае.

«Социальнэ пшъэрылъхэр зэкIэ гъэцэкIагъэ хъунхэм тынаIэ лъэшэу тетэгъэты. Анахь мэхьанэ зиIэхэм ащыщых сабый цIыкIухэр зэрыс унагъохэм, джащ фэдэу унэгъо Iужъухэм IэпыIэгъу ятыгъэнымкIэ Iофтхьэбзэ зэфэшъхьафхэр гъэфедэгъэнхэр. Илъэси 3-м къыщегъэ­жьагъэу илъэси 7-м нэс зыныбжь кIэлэцIыкIухэм, джащ фэдэу ящэнэрэ сабыеу къэхъурэм апае аратын фэе ахъщэм къыхагъэкIыгъэ мылъкур икъоу пэIухьащт», — къы­Iуагъ КъумпIыл Мурат.

Урысые Федерацием и Правительствэ иIэпэчIэгъэнэ фонд ахъщэр къыхагъэ­кIыгъ. Урысые Федерацием и Правительствэ Федеральнэ ЗэIукIэм и Комиссие къызыдырегъэштэ нэуж унашъохэр ыштагъэх. Бюджет ассигнованиехэр атегощэгъэнхэмкIэ Къэралыгъо Думэм Адыгеим ыцIэкIэ идепутатэу Владислав Резник ишIуагъэ къэкIуагъ.

Депутатым къызэрэхигъэщыгъэмкIэ, 2022-рэ илъэсым мэкъуогъум и 1-м къыщыублагъэу урыпсэунымкIэ анахь ахъщэ макIэу агъэнэфэгъагъэр проценти 10-кIэ индексацие зэрашIыгъэм епхыгъэу ахъщэ тедзэр къафыхагъэ­кIыгъ. Унагъохэу къэралыгъо IэпыIэгъу зищыкIагъэхэр ащ къыхэкIэу нахьыбэ хъугъэх.

«УрыпсэунымкIэ анахь ахъщэ макIэр зыфэдизым елъытыгъэу мазэ къэс ахъщэ къаратыным ифитыныгъэ зиIагъэхэм япчъагъэ хэхъощт индексацием ишIуагъэкIэ. Урысые Федерацием и Президент, и Правительствэ ыкIи Къэралыгъо Думэм аштэгъэ унашъохэм ащ фэдэ кIэухышIу къакIэ­кIуагъ. Социальнэ пшъэрылъышхохэр гъэцэкIагъэ хъунхэм пае федеральнэ лъэныкъом къикIырэ IэпыIэгъур нахьыбэ зэрэхъущтым республикэм иIэшъхьэтетхэр тигъусэхэу тапэкIи тынаIэ тедгъэтыщт», — къыIуагъ Владислав Резник.

АР-м и ЛIышъхьэ ипресс-къулыкъу