УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм къызэрэщыдэлъытагъэу, фэтэрыбэу зэхэт унэхэм ящагухэм ягъэкIэжьын Адыгеим щылъагъэкIуатэ.

Мы лъэпкъ проектыр пхырыщыгъэным фэшI аштэгъэ федеральнэ проектэу «Iэрыфэгъу къэлэ щыIакIэр гъэпсыгъэ­ныр» зыфиIорэм рыгъуазэхэзэ Мые­къуапэ щызэтырагъэпсы­хьагъ урамхэу Краснооктябрьскэмрэ Комсомольскэмрэ зы­щызэуалIэ­хэрэм дэжь щыт унэхэм ящагу.

АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, ООО-у «Дортранс» зыфиIорэр ары подрядчикэу ащ Iоф дэзышIагъэр. Щагум спортым щыпылъынхэу площадкэ, кIэлэцIыкIу джэгупIэ щагъэпсыгъэх, автомобиль уцупIэхэр фашIыгъэх, тIысыпIэхэр, хэкI­идзапIэхэр щагъэуцугъэх. Джащ фэдэу жъы хъугъэ чъыгэу зи­къутамэхэр къыпыкIыкIынхэм ищынагъо къэзытыхэрэр е лъэ­гэ дэдэу къэкIыгъэу электричествэм икIуапIэхэм анэсыгъэхэр къаупкIыхьагъэх.

ЦIыфэу унэхэм ачIэсхэм щагур зэрэзэтырагъэпсыхьа­гъэм, подрядчикым IофшIэнхэр зэрэзэшIуихыгъэхэм зэрагъэрэзагъэхэр министерствэм къыщыхагъэщыгъ.

ПстэумкIи мы проектым сомэ миллион 13-рэ мин 72,4-рэ пэIухьагъ.

«Iэрыфэгъу къэлэ щыIакIэр гъэпсыгъэныр» зыфиIорэ федеральнэ проектым хахьэу Мые­къопэ районым ипоселкэу Тульскэм игупчэ ит скверри агъэкIэжьыгъ. Подрядчикым IофшIэнхэр ыухыгъэх.

Скверым жъы хъугъэ асфальтэу телъыр тырахи, плиткэкIэ агъэпкIагъ, тIысыпIэхэр, чэщ остыгъэхэр, хэкIидзыпIэхэр щагъэуцугъэх, чъыгхэр, куандэхэр, къэгъэгъэ зэмылIэужыгъохэр щагъэтIысхьагъэх.

Джы ар поселкэр къэзыгъэ­дэхэрэ гъэпсэфыпIэ чIыпIэ хъугъэ.