Урысые Iофтхьабзэу «БумБатл» зыфиIорэм къыдыхэлъытагъэу «Молодежки ОНФ» зыцIэм хэтхэр чъэпыогъум и 18-м предприятиеу «Картонтарэм» щыIагъэх, тхылъыпIэм Iоф зэрэдашIэрэр, ащ картон зэрэхашIыкIырэр зэрагъэлъэгъугъ.

Iоныгъом и 15-м къыщегъэ­жьагъэу ямыщыкIэгъэжь тхылъы­пIэм иугъоин фэгъэхьыгъэ Iоф­тхьабзэм нэбгырэ 159760-рэ хэлэжьагъ. Килограмм 438000-рэ аугъоигъ, ащ ишIуагъэкIэ чъыг 8800-рэ е мэз гектар 90-рэ, псы литрэ миллиони 8,7-рэ къызэтырагъэнэжьын ыкIи углекислэ газ тонн 722-рэ атмосферэм хамыгъэхьан алъэ­кIыгъ.

Къэралыгъохэм зэкIэми яэкологие нахьышIу шIыгъэныр, цIыфхэм япсауныгъэ къызэтегъэнэжьыгъэныр ары пшъэрылъ шъхьаIэу зэхэщакIохэм зыфагъэуцужьырэр. Экологием илъэ­ныкъо зэфэшъхьафхэр лъэпкъ проектым къыделъытэх, ащ федеральнэ проекти 9 хэхьэ.

«БумБатл» зыфиIорэ Iоф­тхьабзэр лъэпкъ проектэу «Эко­логия» зыфиIорэм къыдыхэ­лъытагъэу ящэнэрэу зэхащэ. БлэкIыгъэ илъэсхэм кIэлэцIыкIу IыгъыпIэ, гурыт ыкIи апшъэрэ еджэпIэ, колледж ыкIи унэе компание мини 2-м ехъу ащ хэлэжьагъ. Нэбгырэ миллион 1,2-мэ тхылъыпIэ тонн мини 3,1-рэ аугъоигъэх, чъыг мин 62-рэ къызэтырагъэнэжьыгъ.

Макулатурэм иугъоин компаниехэу Росатомыр, Сбербанкыр, Урысыем и Почтэ, ЕвроХимыр ыкIи нэмыкIхэр хэлажьэх. Мы илъэсым Урысыем и Почтэ къызэриIуагъэмкIэ, шъолъыр 35-рэ Iофтхьабзэм къыхэлажьэ, корпоративнэ угъоиным нэмыкIэу почтэм иотделение 254-мэ цIыфхэм ямыщыкIэгъэжь тхылъы­пIэр къарахьылIэн амал яI.

Iофтхьабзэр коммерцием емыпхыгъэ Автоном организациеу «Национальные приоритеты» зыфиIорэм игукъэкIыкIэ зэхащэ. Ащ иIэпыIэгъух УФ-м экологиемкIэ ыкIи чIыопс баиныгъэхэмкIэ и Министерствэ, гъэсэныгъэмкIэ Министерствэр, шIэныгъэмкIэ ыкIи апшъэрэ гъэсэныгъэмкIэ Министерствэр. ЗэрагъэнафэрэмкIэ, 2024-рэ илъэсым нэс коммунальнэ пыдзэфэ процент 60-р къыдагъэ­кIыжьынэу щыт.