Тызхэт лъэхъаным псынкIэу зызэблехъу. Ащ елъытыгъэу мазэ къэс хабзэм унэшъуакIэхэр къыдегъэкIых е къыдэкIы­гъа­хэхэм зэхъокIыныгъэхэмрэ хэгъэхъонхэмрэ афешIых.

Чъэпыогъу мазэм иунэшъуакIэу кIуачIэ зиIэ хъугъэхэр зилэжьапкIэ къыхэхъощтхэм, дзэ къулыкъур зыхьыхэрэм, мэшIо­кухэм узэрарытIысхьащт билетхэм якъэщэфын, нэмыкIхэми афэгъэхьыгъэх.

ЯлэжьапкIэ къаIэтыгъ

Бюджет организациехэмрэ дзэ частьхэм ащымыщхэу, ау Iоф ащы­зышIэхэрэмрэ ялэжьапкIэ тызхэт ма­зэм къыщегъэжьагъэу проценти 4 къы­хэхъуагъэу къаратыщт.

Зиахъщэ къыхэхъощтхэм ащыщых контрактым кIэтхагъэу дзэ къулыкъур зыхьыхэрэр, Росгвардием хэтхэр, мэшIогъэкIуасэхэр, таможнем иIофышIэхэр, нэмыкIхэри.

ФэдитIукIэ нахьыбэщт

Зыныбжь илъэс 80-м нэсыгъэу Iоф зымышIэжьхэрэм япенсиехэм къаха­гъэхъорэ ахъщэр къаIэтыгъ.

ЗэрамыхъокIырэ Iахьэу къафакIорэр джынэс зэрэ­хъущтыгъэр сомэ мини 6,5-рэ, индексацие къызафашIыкIэ, а пчъагъэр фэдитIукIэ нахьыбэ хъущт. Ахэм тхылъ гъэнэфагъэхэр агъэхьазырынхэу щытэп, лъэIу тхылъхэр атхынхэу ищыкIагъэп.

Джащ фэдэу Хэгъэгу зэошхом хэлэжьагъэхэмрэ яунагъохэм арысхэмрэ къаратырэ пенсием процент 15,5-рэ къыхагъэхъонэу унашъо ашIыгъ. (Федеральнэ законэу N 396-р, УФ-м и Правительствэ иунашъоу N 719-р).

ПIалъэр лъагъэкIотагъ

НыбжьыкIэхэр дзэ къулыкъум зы­да­щыщтыгъэхэ пIалъэр мыгъэ зэбла­хъугъ.

Бжыхьэ дэщыгъор чъэпыогъу мазэм рагъажьэщтыгъэмэ, джы шэкIогъум нэс лъагъэкIотагъ.

Генштабым къызэриIорэмкIэ, ар Украинэм щыкIорэ хэушъхьафыкIыгъэ дзэ операцием епхыгъэп, дзэм дащыхэрэм зэкIэми къулыкъур Урысыем щахьыщт. Джащ фэдэу дзэ къулыкъур къэзыухыгъэхэр ядэжь къатIупщыжьыщтых.

«Мирым» къихьащтых

Чъэпыогъум и 26-м къыщегъэжьагъэу картэу «Мир» зыфиIорэ закъор ары цIыфхэм къаратырэ ахъщэ тедзэхэр зэрагъэхьащтхэр.

Ахэм ахэхьэх коммунальнэ фэIо-фашIэхэм алъатырэ ахъщэр, къэралыгъо социальнэ IэпыIэгъумкIэ хэбзэгъэуцугъэм къыдилъытэрэ пенсие тедзэхэр, фэгъэкIотэныгъэ зиIэхэм къаратырэ ахъщэр, социальнэ IэпыIэгъур, субсидиехэр, компенсациехэр, нэ­мыкIхэри.

Ахэм афэшъхьафэу «Урысыем идонор гъэшIуагъ» зыфиIорэ бгъэхалъхьэр къызэратыгъэхэми картэу «Мирыр» ары яахъщэ тынхэр къызэрагъэхьащтхэр.

Зы сатыркIэ

* Урысыем Iоф щызышIэрэ компаниехэу лъым хэлъ плазмэр агъэфедэзэ Iэзэгъу уцхэр къыдэзыгъэкIыхэрэр джы IэкIыб хэгъэгухэм къаращырэ компонентхэм ащыгугъыжьыщтхэп ыкIи нахьыбэрэ яжэжьыщтхэп. Ары пакIошъ, тидонорхэм атырэ лъым щыщи хэгъэгум рарагъэщыщтэп гуманитарнэ IэпыIэгъум къыхиубы­тэрэм нэмыкIэу.

* МэшIогъэкIосэ къулыкъум икъутамэхэр зыдэтыщт псэупIэхэр къызэрэхахыщтхэ шIыкIэхэр агъэнэфагъэх. Урысые Федерацием и Правительствэ ахэр зыхэхьащтхэ чэзыур егъэхьазыры. Анахьэу мэхьанэ зэратыхэрэр псэупIэхэм нэбгырэ пчъагъэу адэсымрэ экономикэм зыкъыригъэIэтын зылъэкIыщт промышленнэ хъызмэтэу яIэмрэ.

* МэшIокухэмкIэ зекIохэу плацкарт е вагон къызэрыкIохэр къыхэзыхыхэрэм къащэфырэ билетхэм ауасэ чъэпыогъум къыщегъэжьагъэу къыхэхъуагъ. РЖД-м итарифхэр проценти 6,52-кIэ къыIэтыгъэх. Экспертхэм къызэраIорэмкIэ, билет уасэхэр гурытымкIэ соми 100 фэдизкIэ нахьыбэ хъугъэх.

Шъаукъо Аслъангуащ.