Адыгэ Республикэм и ЛIышъхьэу КъумпIыл Мурат Мыекъуапэ икъэлэ парк дэжь зы­гъэпсэфыпIэу щашIырэм ыкIи псыхъоу Шъхьэгуащэ инэпкъхэм язэтегъэпсыхьан епхыгъэ IофшIэныр зэрэкIорэм зыщигъэгъозагъ.

Адыгэ Республикэм социальнэ-экономикэ хэхъоныгъэмкIэ ипрограммэ диштэу проектыр агъэцакIэ, федеральнэ гупчэм иIэпыIэгъу хэлъэу псэолъэшIыным сомэ миллион 450-рэ фэдиз пэIухьанэу щыт.

Мы уплъэкIун IофшIэнхэм къахэлэжьагъэх Адыгэ Респуб­ликэм и Премьер-министрэ ипшъэрылъхэр зыгъэцэкIэрэ КIэрэщэ Анзаур, АР-м псэолъэ­шIынымкIэ, унэ-коммунальнэ ыкIи гъогу хъызмэтымкIэ иминистрэу Валерий Картамышевыр, Адыгеим архитектурэмкIэ икомитет итхьаматэу Зезэрэхьэ Азэмат, Адыгэ Республикэм мэзхэмкIэ и ГъэIорышIапIэ ипащэу Былымыхьэ Рэщыд, Мые­къуапэ имэрэу Геннадий Митрофановыр, ГКУ-у «Стройзаказчикым» ипащэ ипшъэрылъхэр зыгъэцэкIэрэ Хьаджымэ Аслъан, пшъэдэкIыжьэу ыхьырэмкIэ гъу­нэпкъэ гъэнэфагъэ зиIэ обществэу «Форвардым» идиректорэу ДзэлI Аскэр, проект ыкIи подряднэ организациехэм ялIыкIохэр.

Проектым тегъэпсыхьагъэу Шъхьэгуащэ инэпкъхэу километри 2,5-м ехъумэ ягъэпытэнкIэ IофшIэнышхо макIо илъэсэу икIыгъэм къыщыублагъэу. Паркым цIыфхэр зыщытезекIухьэщтхэ ичIыпIэхэр ыкIи иджэгупIэхэр зэтырагъэпсыхьэх. ДжырэкIэ специалистхэм анаIэ зытетыр тIысыпIэхэм ягъэкIэ­рэкIэн, клумбэхэм нахь теплъэ дахэ яIэу шIыгъэныр, зызща­тIэкIыщт ыкIи зытелъыщтхэр, джащ фэдэу архитектурнэ пкъы­гъо цIыкIухэм ягъэуцун. Къалэу Мыекъуапэ итамыгъэу щыт мы­Iэрысэ чъыгым гупчэр къыгъэкIэрэкIэщт.

IофшIэнхэр ыкIэм фэкIох ыкIи зэрэгугъэхэрэмкIэ, тыгъэгъазэм ахэр аухынхэу ары. А уахътэм къыкIоцI псэолъэшIхэм ищыкIагъэр зэкIэ икъоу агъэхьазырын фае цIыфхэм языгъэпсэфыгъо уахътэ гуIэтыпIэу ыкIи щынэгъон­чъэу щытынымкIэ, джащ фэдэу Адыгеим и ЛIышъхьэ уплъэкIунхэм ялъэхъан ынаIэ зытыридзэгъэ щыкIагъэхэр дэгъэзыжьы­гъэнхэмкIэ.

Республикэм ипащэ паркым къыпэIулъ чIыпIэр аукъэбзынэу, тIысыпIэхэр агъэуцунхэу, ахэр зэдиштэу щытынхэм анаIэ тырагъэтынэу, санитарнэ шъолъыр­хэм апае чIыпIэхэр агъэнэфэнхэу пшъэрылъ афишIыгъ. Нэпкъ ехыпIэм иIэ лъэсрыкIо гъогу цIыкIухэм, паркым чъыг-къэгъа­гъэхэр дэгъэтIысхьэгъэнхэм япроектхэмкIэ КъумпIыл Мурат щыкIэгъэ заулэ афилъэгъугъ. Щынэгъончъэныр нахь гъэлъэшыгъэным пае камерэхэм яп­чъа­гъэ нахьыбэ ашIынэу пшъэ­рылъ афигъэуцугъ. Паркым иIофы­шIэхэм къызэраIуагъэмкIэ, агъэ­тIысыгъэ чъыг-къэгъагъэхэм ащыщхэр атыгъугъэхэу агъэунэфыгъ.

Адыгеим и ЛIышъхьэ джащ фэдэу хэушъхьафыкIыгъэ пшъэ­рылъхэр афишIыгъэх клумбэхэм язэтегъэпсыхьанкIэ, псыхъом инэпкъхэр икъоу къэнэфынхэмкIэ Iэмэ-псымэхэр агъэуцунхэу. КIэлэцIыкIухэм зызщагъэпсэ­фыщт ыкIи зыщыджэгущтхэ чIыпIэр цыхьэшIэгъоу ыкIи теп­лъэ дахэ иIэу шIыгъэнми анаIэ тырари­гъэдзагъ.

«ЗыгъэпсэфыпIэм игъэфедэнкIэ ищыкIагъэр зэкIэ игъэкIотыгъэу къы­дэшъулъыт, зы теплъэ зэикI дахэ щыIэным шъунаIэ тежъу­гъэт. Къэлэдэсхэми, рес­публикэм ихьакIэхэми зыщагъэпсэфынымкIэ джырэ уахътэм диштэрэ гуIэтыпIэ чIыпIэу мыр хъун фае», — къыхигъэщыгъ КъумпIыл Мурат.

Джащ фэдэу Адыгэ Респуб­ликэм и ЛIышъхьэ ынаIэ зытыридзагъэхэм ащыщ псэолъэшIыным иятIонэрэ чэзыу къыди­лъытэрэ Iофтхьабзэхэр: бассейныр зэтегъэпсыхьэгъэныр, пар­кым игупчэ аллее къикIэу бассейным екIурэ дэкIояпIэхэр гъэ­кIэрэкIэгъэнхэр.

Шъугу къэтэгъэкIыжьы: ятIо­нэрэ чэзыур гъэцэкIагъэ хъуным пае федеральнэ гупчэм иIэпыIэгъу тищыкIагъ. Ащ фэгъэхьыгъэу къыIогъагъ Урысыем ивице-премьерэу Дмитрий Чернышенкэм Адыгеим къызэкIом. Проектыр игъоу ащ ылъытэгъагъ.

АР-м и ЛIышъхьэ ипресс-къулыкъу