Мэкъумэщ хъызмэтыр Ызыныкъор халъхьэгъах
Адыгеим ичIыгулэжьхэм бжыхьэсэ лэжьыгъэхэм япхъын лъагъэкIуатэ.
2023-рэ илъэсым Iуахыжьынэу мыгъэ бжыхьасэу халъхьащтыр пстэумкIи гектар 112466-рэ мэхъу. БлэкIыгъэ илъэсым халъхьэгъагъэм нахьи гектар мини 8-м ехъукIэ нахьыб. Гектар 10126-р бжыхьэсэ хьэм рагъэубытыщт, 91372-м коцыр халъхьащт. Джащ фэдэу тритикале гектари 120-рэ, кIымэфэ чъыIэм «ымыгъэщтэрэ» рапсэу гектар 10848-рэ агъэнэфэгъагъэу апхъыгъ.
АР-м мэкъумэщ хъызмэтымкIэ и Министерствэ чъэпыогъум и 17-м къызэритыгъэмкIэ, бжыхьасэу гектар 57312-рэ халъхьэгъах. Ар агъэнэфагъэм ызыныкъом ехъу. Анахьыбэу бжыхьэсэ лэжьыгъэр хэзылъхьащтыр Джэджэ районым ичIыгулэжьхэр ары. ПстэумкIи гектар 33740-рэ агъэнэфагъ. Ащ щыщэу 24522-р коцы, 6232-р рапс, хьэм гектар 2916-рэ рагъэубытыщт. Мы уахътэм хагъэкIыгъэр 20655-м ехъу.
Шэуджэн районым ибжыхьасэхэри анахьыбэхэм ащыщ. ПстэумкIи гектар 17765-рэ ахэм яI. Ащ щыщэу 14800-р коцым, гектар 1650-р хьэм арагъэубытыщт, рапс гектар 1260-м ехъу, тритикалеу 50 халъхьэгъах. Коцымрэ хьэмрэ ахагъэкIыгъэр гектар 14141-рэ мэхъу.
Бжыхьэсэ гектар 18550-рэ Кощхьэблэ районым ичIыгулэжьхэм агъэнэфагъ. Ащ щыщэу 15000-р коцы, 1600-р хьэ, рапс гектар 1950-рэ апхъыгъ.
ХЪУТ Нэфсэт.