ИупчIэ анахь дэгъухэм ахалъытагъ
Адыгэ къэралыгъо университетым истуденткэу Арина Додильнаяр дунэе зэнэкъокъоу «Напиши свой вопрос для Географического диктанта-2022» зыфиIорэм хэлэжьагъ ыкIи текIоныгъэ къыдэзыхыгъэ нэбгыритфымэ ащыщ хъугъэ.
Ащ упчIэу ыгъэхьазырыгъэр 2022-рэ илъэсым атхыщт Географическэ диктантым хагъэхьащт. Урысыем ишъолъыр 59-м, джащ фэдэу Белоруссием, Молдавием, Францием, Чехием, Казахстан ыкIи США-м къарыкIыгъэ упчIэ 532-рэ зэнэкъокъум къагъэхьыгъ.
Анахь упчIэ дэгъухэр зыгъэхьазырыгъэхэр Москва дэт Урыс географическэ обществэм и Штаб-квартирэ рагъэблэгъагъэх.
Арина Додильнаяр Адыгэ къэралыгъо университетым адыгэ филологиемкIэ ыкIи культурэмкIэ ифакультет иапэрэ курс щеджэ. Географиер ицIыкIугъом къыщегъэжьагъэу икIас. Мы предметымкIэ кIэлэеджакIохэм апае зэхащэрэ Урысые олимпиадэм, джащ фэдэу гъэрекIо «Географический диктант 2021» зыфиIорэм ахэлэжьагъ. Аринэ ыгъэхьазырыгъэ упчIэр Адыгеем игеографиерэ илитературэрэ афэгъэхьыгъ.
Мы илъэсым Географическэ диктантыр чъэпыогъум и 30-м сыхьатыр 12-м зэхащэщт. Мыгъэ ар я 7-у рагъэкIокIыщт. Къэралыгъуи 109-рэ хэлэжьэщт, хабзэ зэрэхъугъэу республикэмкIэ ар Адыгэ къэралыгъо университетым щыкIощт.