УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу гъогу Iахьи 5 Мыекъуапэ щагъэцэкIэжьыгъ.

АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, урамхэу Советскэм, Гоголым, Пушкиным ацIэ зыхьы­хэрэм ыкIи Пионерскэм, Мыекъопэ къэлэ коим хэхьэрэ поселкэу Родниковэм иурамэу Советскэм яIахьых агъэкIэжьыгъэхэр. ПIалъэм илъэс псаукIэ ыпэ итхэу IофшIэнхэр зэшIуахыгъэх. Ахэр къэкIорэгъыр ары проектым зэрэхэтыгъэхэр. Федеральнэ шапхъэхэм адиштэу автомобильхэм якIуапIэхэри, лъэсрыкIо гъогухэри ашIыгъэх, ахэм азыфагу къыриубытэрэри зэтырагъэпсыхьагъ.

Джащ фэдэу мы лъэпкъ проектым ипхырыщын пае аштэгъэ шъолъыр проектэу «Общесистемные меры развития дорожного хозяйства» зыфиIорэм къыдыхэлъытагъэу хьылъэзещэ автомашинэхэр къэзыщэчыщт системэхэм ягъэуцун рес­публикэм щэкIо. Министерствэм къызэритыгъэмкIэ, 2024-рэ илъэсым нэс чIыпIи 6-мэ ащ фэдэ псэуалъэхэр ащашIыщтых.

Мы илъэсым тIу агъэпсынэу проектым зэрэхэтыгъэр. Ащ диштэу селоу Красногвардейскэм икIэу къуаджэу Улапэ зэпичызэ поселкэу Заревэм екIолIэрэ автомобильнэ гъогур, селоу Еленовскэм дэжь щырагъэжьэгъагъэр аухыгъэх. Систе­мэм хьылъэзещэм ионтэгъу­гъэ къыгъэнэфэщт, шапхъэхэм ашIо­кIэу ар ушъагъэмэ ГИБДД-м занкIэу къэбарыр лъигъэIэсыщт. Мы уахътэм тхылъэу ищыкIа­гъэхэр агъэпсых. Псэуалъэм ишIын республикэ бюджетым къыхэхыгъэу пстэумкIи сомэ миллион 75,3-рэ пэIуагъэхьагъ.

ЯтIонэрэ системэри селоу Еленовскэм дэжь щагъэуцущт, ау ар шъолъыр мэхьанэ зиIэ гъогоу селоу Белэм икIэу къутырэу Дэгужъыем кIорэм те­тыщт. Мы уахътэм чIыпIэу зыдэщытыщтыр агъэхьазыры, ар ашIыфэкIэ автомашинэхэр зэрыкIощтхэ гъогур агъэпсыгъ.

Мы псэуалъэм ишIын зэкIэмкIи сомэ миллион 77,8-рэ пэIуа­гъэхьащт, 2022-рэ илъэсым итыгъэгъазэ и 30-м нэс аухынэу проектым къыдэлъытагъ.