Ащ фэдэ хэбзэукъоныгъэхэр Шэуджэн, Кощхьэблэ, Красногвардейскэ ыкIи Джэджэ районхэр ары шъолъыр опе­раторым мы мазэм зыщигъэунэфыгъэр. Чъыг сатырхэм, гъогу гъунэхэм ащыратэкъугъэр кубометрэ 450-м ехъу.

«ЭкоЦентрэм» испециалистхэу экологием фэгъэ­загъэхэм къызэраIуагъэмкIэ, гъэбылъыгъэу Iоф зышIэу, цIыфхэм ыпкIэ къаIахэу, полигонэу агъэнэфагъэм зэрэщыратэкъущтым ыпкIэ амытэу хэкIыр дэзыщыхэрэм ар яIэшIагъ. Ащ тетэу ахэм тыкъэзыуцухьэрэ дунаир аушIои.

Шъугу къэтэгъэкIыжьы, ащ фэдэ «свалкэхэр» зышIыхэрэм административнэ пшъэдэкIыжь ахьыщт. ХэкIыр шапхъэхэм адиштэу гъэкIодыгъэным пае «ЭкоЦентрэм» зэзэгъыныгъэ дашIын фае. Ащ ищыкIэгъэ тхылъыр компанием иофисхэм ащатын алъэ­кIыщт. Мары адресхэр: къалэу Мыекъуапэ, урамэу Пионерскэр, 297, поселкэу Яблоновскэр, урамэу Школьнэр, 10/1. «ЭкоЦентрэм» иинтернет нэкIубгъоу https://adygeya.clean-rf.ru зыфиIорэр агъэфедэми хъущт.

Зыщамыгъэнэфэгъэ чIыпIэм хэкIыр щыратэкъугъэу зылъэгъурэр мы телефонхэмкIэ къытеон ылъэкIыщт: 8-800-707-05-08, 8-962-868-14-62.

ООО-у «ЭкоЦентрэм» и Адыгэ шъолъыр къутамэ ипресс-къулыкъу.

НэкIубгъор зыгъэхьазырыгъэр Хъут Нэфсэт.