Арыщтын адыгэхэм «Узщефэхыщтыр ошIэмэ, уапэкIэ пIэ шъабэ бгъэ­тIылъын» зыкIаIуагъэр. Ары, щыIэныгъэр аукъодыеп: мафэ пэпчъи зэ­фэдэп, уинасыпмэ упцIымэмэнэп, къин къыпфэкIонэп, узэхэзышIы­кIынэу, ыIэ къыпфэзыщэинэу щыIэр зырыз. Джа зырызхэр арэу къыс­щэхъу мы дунэе плъырыр къызэтезыгъанэрэр.

Тиреспубликэ адыгабзэкIэ къыщыдэкIырэ гъэзет закъоу, илъэси 100 ныбжьым къекIо­лIэгъэ «Адыгэ макъэм» гъусэныгъэ-ныбджэгъуныгъэ къы­дызиIэ цIыф хьалэл къызэрыкIуабэ къыфэтхэ. Ахэр ясэнэ­хьаткIи ядунэееплъыкIэкIи ма­кIэу зэтекIых: кIэлэегъаджэх, хэбзэ IофышIагъэх, библиотекарыгъэх, медсестрагъэх, колхоз-совхозхэм чанэу ащылэ­жьагъэх. Джы аныбжь икъугъэу, пенсием нэсыгъэх. Ахэм якIас цIыфхэр, унэм исынхэ къодыим езэгъыхэрэп, ащ къыхэкIэу, адыгэ гъэзетым ягугъэ-гукIаехэмкIэ къыдэгуащэх, ащкIэ щы­Iэныгъэм зэрэхэтхэр зыда­шIэ­жьэу, гъэзетым ятхыгъэ ралъэ­гъожьмэ, гуапэ ащэхъу.

Джащ фэдэу къытфатхэхэрэм ащыщых Пщыкъэнэ Майе, Хьабэхъу Нуриет, Хъут Сарэ, ЦIыкIу Мурат, нэмыкIхэри. Хэти ишэн ыкIи ыгу тешIыкIыгъэу къэтхэ: зым икъуаджэ дэс цIыф чанхэр, хъупхъэхэр тегъашIэх, адрэм илIакъо, иунагъо щыщхэм якъэбар къеIуатэ.

Къуаджэу Натыхъуае щыщ Хьахъурэтэ Светланэ Федор ыпхъум итхыгъэ адрэ пстэуми атекIэу сеплъыгъ, унэпс къемыхэу, угу къымыфызэу ухэт- ми уеджэшъун Iоу сшIэрэп.

«СигъашIэ щыщэу илъэс 50-р IофшIэным естыгъ, культурэм ыкIи искусствэм япхыгъагъ. ЦIыф зэфэшъхьафхэм, IэнатIэ зыIыгъхэм садэлэжьагъ. Мэхьанэ зиIэ хъугъэ-шIагъэхэм- кIэ а уахътэр баигъ. СиIофшIагъэ ифэшъошэ уасэ къыфа­шIыгъ — щытхъу тхылъхэр бэу сиIэх, «АР-м культурэмкIэ изаслуженнэ IофышI» зыфиIорэр къысфагъэшъошагъ. Пенсием сынэси, сызэтIысыжьым, бэ скIэхэкIыгъэр, сащыгъупшэжьынэу, хэти сцIэ къыримыIожьынэу, сикъарыоу Iофым хэслъхьэгъэ пстэури кIодыжьыщтэу къысщыхъу­гъагъ. Ау уахътэ зытешIэм Iофыр ащ зэрэтемытыр зэхэс­шIагъ.

ЦIыфыр дунаим тетыфэ бэ пэкIэкIырэр, зэхишIэрэри ащ нахьыбэжь — гушIуагъуи, тхъа­гъуи ыкIи тхьамыкIагъуи.

Сынэмэ амылъэгъужьэу сымаджэ сызэхъум, пIэхэлъ шъып­къэ сыхъугъ, IэпыIэгъу сищыкIэгъагъ. Мы чIыпIэ къиным анахь IэпыIэгъу ин къысэзытыгъэр а уахътэм республикэм- кIэ хьафизэхэм яобществэ ипэщагъэу Нэхэе Руслъан Къамболэт ыкъор ары. Ащ ихьатыркIэ зыгорэущтэу слъэ сыкъы­теуцон слъэкIыгъ. А цIыфышIур непэ къызнэсыгъэми бэрэ къыс­кIэупчIэ, мэфэкIхэмкIэ къысфэгушIо. Сэщ фэдэ цIыфхэм садэгущыIэзэ къэсшIагъ, Нэ­хаир сэщ нэмыкI нэбгырэ 21-мэ (тирайон исхэм) зэрадеIэрэр.

Сипсауныгъэ изытет ыпкъ къикIэу Тэхъутэмыкъое районым иадминистрацие икъулыкъу­шIа­гъэу Хьатитэ Симэ Хьаджмосэ ыпхъум зыфэзгъазэу къы­­хэ­кIыгъ. Сыдигъуи сиIофыгъохэр псынкIэу зэшIуихыщтыгъ.

Зы мэфэкI е нэмыкI хъу­гъэ-шIагъэ кIорэп къоджэ коим е район администрацием япащэ­хэм агу сыкъэмыкIэу, сцIэ къы­рамыIоу, шIухьафтынхэри къы­сатых. Нэ­ужь­рэкъо Алый Шы­хьам ыкъор е депутатхэр са­дэжь къэкIох.

Сэ сшъхьэкIэ лъэшэу сафэраз тирайонкIэ культурэм иотдел ипащэу Ацумыжъ Рустам, тхылъеджэпIэ системэм идиректорэу ШэхэлI Саидэ, Адыгеим и Къэ­ралыгъо Совет — Хасэм идепутатэу Джастэ Вячеслав, заом ыкIи IофшIэным иветеранхэм я Совет итхьаматэу Бэгугъ Нэф­сэт. Мы­хэм зэкIэми сащыгъу­пшэрэп ыкIи Iофтхьабзэу зэхащэхэрэм сахагъэлажьэ, зыкъыс­IуагъакIэ, тызэдэгущыIэ, сыгу къаIэты.

Къоджэ коим иадминистрацие ипащэу Хьахъурэтэ Адам чылэм иIофхэм язытет къысфеIуатэ, къыхэкIы къысэупчIыжьэуи ыкIи а есIуагъэр къышъхьапэуи. Мы зыцIэ къесIуагъэхэм цIыфыгъэу зэрахьагъэр зымыуасэ щыIэп.

ЦIыфхэр социальнэу къэу­хъумэгъэнхэмкIэ, республикэм щызэшIуахырэр бэ, ащ фэгъэзэгъэ Министерствэм ипащэу Мырзэ Джанбэч Рэмэзан ­ыкъом а пшъэрылъхэр дэгъоу зэшIуе­хых. Мы къулыкъум хэт цIыфхэр зэрэгукIэгъушIэхэр гъуащэрэп, аIэ зэкIэдзагъэу, амал зимыIэ пэпчъ зэрэдеIэнхэм яшъыпкъэу пылъых. Лъэшэу сэгушIо мы охътэ ехьыжьагъэм цIыфышIухэр зэрэхэтхэм.

Сыгу къыздеIэу зэкIэми шъхьа­щэ къышъуфэсэшIы, Iофэу шъушIэрэм шIукIэ къы­шъуфигъэзэжьынэу шъуфэсэIо.

Шъопсэу, шъотхъэжь!»

Хьахъурэтэ  Светлан.