Адыгеим и ЛIышъхьэу КъумпIыл Мурат Мыекъопэ районымкIэ къутырэу Краснэ Улькэмрэ Шэуджэн районымкIэ къутырэу Тихоновымрэ ащаублэгъэ кIэлэцIыкIу IыгъыпIитIумэ яшIын зэрэкIорэр ыуплъэкIугъ.

Адыгеим и ЛIышъхьэ муниципальнэ пащэхэм пшъэрылъ афишIыгъ ахъщэм игъэфедэнрэ IофшIэнхэр зэрэкIохэрэм идэгъугъэрэ анаIэ атырагъэтынэу. Джащ фэдэу псэуалъэхэм яшIын ипIалъэм аухынэу афигъэпы­тагъ.

ГущыIэм пае, къутырэу Краснэ Улькэм кIэлэцIыкIуи 150-рэ зычIэфэщт IыгъыпIэу щашIырэр тыгъэгъазэм аухынэу рахъу­хьагъ. ДжырэкIэ дэпкъхэм япхыгъэ IофшIэнхэр агъэцакIэх. Программэу «Къуаджэхэм яхэ­хъоныгъ» зыфиIорэм тегъэпсы­хьагъэу ар ашIы. КIэлэцIыкIу IыгъыпIэм сомэ миллион 212-рэ фэдиз пэIухьащт. Къутырэу Краснэ Улькэм щашIырэм амал къытыщт кIэлэцIыкIухэу джыри еджапIэм мыкIохэрэм илъэсыбэрэ IыгъыпIэм чIыпIэ зэрэщамыгъотыщтыгъэм иIофыгъо зэшIохыгъэ хъунымкIэ.

Шэуджэн районымкIэ къутырэу Тихоновми мы лъэхъэнэ благъэхэм а Iофыгъо дэдэр щызэшIохыгъэ хъущт. Лъэпкъ проектэу «Демографием» тегъэ­псыхьагъэу кIэлэцIыкIуи 120-рэ зычIэфэщт IыгъыпIэм ишIын мы илъэсым щырагъэжьагъ. ПсэолъэшIхэм тIоу зэтетыщт унэм ыпкъ агъэпсыгъах, джы инженер коммуникациехэм ауж ихьагъэх. Зэхэубытагъэу сомэ миллиони 172-рэ пстэумкIи псэуалъэм тефэщтыр, Iэмэ-псымэхэм апае шъхьафэу сомэ миллион 11 къыхагъэкIыгъ.

Адыгеим и ЛIышъхьэ унашъхьэм епхыгъэ IофшIэнхэр псын­кIэу аухынхэу ыкIи графикым диштэу Iофхэр кIонхэу пшъэ­рылъ афишIыгъ. Илъэсэу къи­хьащтым игъатхэ къутырым щыпсэурэ кIэлэцIыкIухэм ыкIи ащ къыпэблэгъэ псэупIэхэм ясабыйхэр кIэлэцIыкIу IыгъыпIэм ащэнхэм иамал яIэщт.

«ЗэкIэ псэуалъэу лъэпкъ проектхэмрэ къэралыгъо программэхэмрэ къыдалъытэхэрэр ипIалъэм ухыгъэнхэ ыкIи шапхъэу щыIэхэм адиштэнхэ фае. Къуа­джэхэм щыIэкIэ Iэры­фэгъу цIыфхэм щагъотыным, социальнэ фэIо-фашIэхэр зэрищыкIагъэм диштэу щытынхэм ар афэIоры­шIэщт. Арышъ, псэо­лъапхъэхэр нахь лъапIэ мэхъухэми, IофшIэнэу итхъухьагъэхэр дгъэцэкIэщтых. Ащ пае ахъщэ тедзэ къыхэдгъэ­кIыгъ», — къыIуагъ КъумпIыл Мурат.

АР-м и ЛIышъхьэ ипресс-къулыкъу