Частичнэ мобилизацием хэфагъэхэу нэбгырэ 50 Мыекъопэ дзэ бригадэм тхьаумафэм ащагъ.

Мызыгъэгум къаугъоигъэхэр водитель сэнэхьат зиIэхэр ары. Ахэр бригадэм зыщагъэхьазырхэрэм ыуж хэушъхьафыкIыгъэ дзэ операциер зыщыкIорэ чIыпIэ­хэм ащэщтых.

Дзэ комиссариатэу мобилизацием хэфагъэхэр зыщаугъоигъэхэм ахэм ягупсэхэм анэмыкIэу динлэжьхэр, вете­ран ыкIи патриотическэ организацие зэфэшъхьафхэм ялIыкIохэр къекIолIэгъа­гъэх. АР-м и ЛIышъхьэ ыцIэкIэ дзэ­кIолIхэм закъыфигъэзагъ Къэралыгъо Советым – Хасэм и Тхьаматэ игуадзэу, Урысыем и ЛIыхъужъэу Цэй Эдуард.

— Адыгеим хэгъэгум иухъумакIохэм сыдигъокIи шъхьэкIэфэныгъэшхо щафашIы. ТичIыпIэгъоу, дзэ къулыкъум щыIэу, къэралыгъом ыпашъхьэ пшъэ­рылъэу яIэхэр лIыблэнагъэ хэлъэу зыгъэцэкIагъэхэм я Родинэ цIыкIу арэгушхо, — къыIуагъ Цэй Эдуард.

Ащ ыужым мобилизацием хэфагъэхэм зыщычъыещтхэ дзыохэр, зытетIысхьащтхэ алырэгъу цIыкIухэр, хьэшъо щазмэ фабэхэр, плащхэр, радиостанциехэр ыкIи газкIэ Iоф зышIэрэ хьакухэр аратыгъэх. Ахэр АР-м и ЛIышъхьэ пшъэрылъ афишIыгъэу «Единэ Россием» и Адыгэ шъолъыр къутамэрэ бизнесым пылъхэм ащыщхэмрэ яIэпыIэгъукIэ къащэфыгъэх. НэмыкIэу ящыкIэгъэщтхэр дзэ частым къащаратыгъэх.