Iофтхьэбзэ тедзэхэр агъэнэфагъэх
Адыгеим и ЛIышъхьэу КъумпIыл Мурат Адыгэ Республикэм мобилизациемкIэ икомиссие изэхэсыгъо тыгъуасэ зэрищагъ. Урысыем и Президент и Указэу частичнэ мобилизацием игъэцэкIэн, джащ фэдэу ащ къыхиубытэхэрэмрэ ежь яшIоигъоныгъэкIэ дащыхэрэмрэ IэпыIэгъу тедзэ ятыгъэнымкIэ Iофтхьабзэхэм щатегущыIагъэх.
Адыгэ Республикэм идзэ комиссарэу Александр Авериным цIыфхэм ядэщын зэрэкIорэм къытегущыIагъ. ЗэрэхигъэунэфыкIыгъэмкIэ, мобилизацием епхыгъэ Iофтхьабзэхэр зыщызэшIуахыхэрэ лъэхъаным анахьэу анаIэ зытырагъэтырэр тэрэзэу къыхахынхэр, нэмыкIэу къэпIон хъумэ, пунктхэм къаращэлIагъэхэм арагъэгъэзэжьэу къыхэмыкIыныр, чIыпIэхэу ахэр зэращалIэхэрэр щынэгъончъэу щытынхэр ары.
Муниципальнэ комиссиехэм япащэхэм закъыфигъазэзэ республикэм и ЛIышъхьэ къызэрэхигъэщыгъэмкIэ, Урысые Федерацием и Президентэу Владимир Путиным и Указ шIокI имыIэу зэкIэми агъэцэкIэн фае.
«Къэралыгъом ипащэ частичнэ мобилизациемкIэ къыгъэуцугъэ пшъэрылъхэр икъоу гъэцэкIагъэ хъунхэм шъунаIэ лъэшэу тежъугъэтынэу сышъолъэIу. Пстэуми апэу дэшъущыщтхэр дзэ къулыкъум епхыгъэ еджапIэхэр къэзыухыгъэхэр, дзэ Iофым фырагъэджагъэхэр, дзэ къулыкъур сэнэхьатэу къыхэзыхыгъэхэр ары. Мыщ дэжьым анахьэу шъунаIэ зытежъугъэтын фэе Iофыгъохэм ащыщых дзэкIолIхэм ящыкIэгъэ шъуашэмрэ Iэмэ-псымэхэмрэ аIэкIэгъэхьэгъэнхэр», — къыIуагъ КъумпIыл Мурат.
Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженец къызэриIуагъэмкIэ, Адыгеим и ЛIышъхьэ пшъэрылъ къызэрафишIыгъэм тетэу мобилизацием къыхиубытагъэхэм ящыкIэгъэщт шъуашэхэр къащэфых. АщкIэ яшIуагъэ къэкIо партиеу «Единэ Россием» и Адыгэ шъолъыр къутамэрэ предпринимательхэмрэ. ЗэIуагъэкIэгъэ шъуашэхэм кIымэфэ щыгъынхэр гъусэ афашIыжьыгъэх.
Адыгэ Республикэм и Премьер-министрэ ипшъэрылъхэр зыгъэцэкIэрэ КIэрэщэ Анзаур къызэрэхигъэщыгъэмкIэ, мобилизацием къыхиубытагъэхэм ыкIи ахэм яунагъохэм арысхэм IэпыIэгъу тедзэхэр афашIых. Адыгэ Республикэм и ЛIышъхьэ пшъэрылъ зэрафишIыгъэм тетэу ахэм якIэлэцIыкIухэм IэпыIэгъу араты. ГущыIэм пае, кIэлэеджакIохэр ыпкIэ хэмылъэу агъэшхэщтых, кIэлэцIыкIу IыгъыпIэхэм ащэхэрэ сабыйхэм апае ны-тыхэм ыпкIэ атыщтэп. НэмыкI шъолъырхэм ящысэ тетэу IэпыIэгъоу аратырэм джыри нахь зырагъэушъомбгъун мурад яI. Игъо алъэгъугъэхэм ащыщых мобилизацием къыхиубытагъэхэм ялъфыгъэхэу техникумхэм ачIэсхэри ыпкIэ хэмылъэу агъэшхэнхэр, анахь чIыпIэ зэжъу ит унагъохэм арысхэм социальнэ IэпыIэгъу ятыгъэныр, IофшIапIэ агъотынымкIэ адеIэнхэр ыкIи нэмыкIхэр.
Ежь яшIоигъоныгъэкIэ дащыхэрэм сомэ мини 100 зырыз ятыгъэным ифитыныгъэ алъыгъэIэсыгъэнэу игъо алъэгъугъ. ЫпэкIэ ащ фэдэ ахъщэ зэратыщтыгъэр Андырхъое Хъусен ыцIэкIэ щыт Мыекъопэ артиллерийскэ дивизионым идзэкIолIхэу контрактым тетэу дзэ къулыкъум ащагъэхэмрэ мобилизацием къыхыубытагъэхэмрэ ары. Республикэм и ЛIышъхьэ игъо алъэгъугъэхэм адыригъэштагъ ыкIи муниципалитетхэм япащэхэм пшъэрылъ афишIыгъ а IэпыIэгъумкIэ Iофыгъоу зэшIуахын фаехэр ашъхьэкIэ ауплъэкIузэ ашIынэу.
«КIалэмэ тихэгъэгу къаухъумэ, мамырэу цIыфхэм Iоф ашIэн ыкIи псэунхэ амал араты. ЗэрэтфэлъэкIэу ахэм IэпыIэгъу яттын фае зэолIхэр яунагъохэм къафэмыгумэкIынхэм пае. Шъо цIыфхэм яфэныкъоныгъэхэр шъузфэгъэзэгъэ чIыпIэхэм ялъытыгъэу шъолъэгъух, мобилизацием хэфагъэхэм яунагъохэм IэпыIэгъу яшъутын шъулъэкIыщт ыкIи унагъо пэпчъ шъунаIэ тежъугъэт. IофыгъуабэхэмкIэ административнэ унашъохэр штэгъэнхэ фае. ИщыкIагъэу зыщыхъурэм республикэми ащкIэ ишIуагъэ къышъуигъэкIыщт», — икIэухым къыIуагъ КъумпIыл Мурат.
АР-м и ЛIышъхьэ ипресс-къулыкъу