Адыгеим имобилизованнэ дзэкIолIхэм апае зичэзыу шIушIэ IэпыIэгъоу аугъоигъэр тыгъуасэ атIупщыгъ.

Ащ изэхэщэн кIэщакIо фэ­хъугъэр ветеранхэм я Урысые общественнэ организацие и Адыгэ республикэ къутамэу «Боевое братство» зыфиIорэр ары.

ХэушъхьафыкIыгъэ дзэ операциер зырагъэжьагъэм къыщыублагъэу мы организациер шIушIэ IэпыIэгъум иугъоин чанэу хэлажьэ. Джы общест­веннэ организацием илIыкIохэр Адыгеим имобилизованнэ дзэкIолIхэм заIуагъакIэ, ящыкIэгъэ фэIо-фашIэхэр афагъэцакIэх.

— Непэ тидзэ тимобилизованнэ къулыкъушIэхэм апае тыугъоигъэ зичэзыу шIушIэ IэпыIэгъур афэтэтIупщы. Мыщ хэ­хьагъэх псэолъапхъэхэр ыкIи псэолъэшI Iэдэ-уадэхэр: пхъэх­хэр, гъучIIунэхэр, псыр зыпхырымыкIрэ техъохэр, къазгъыр­хэр, нэмыкIхэри. Мы шIушIэ IэпыIэгъур къытфэзгъэхьазырыгъэр компаниеу «Прораб» зыфиIорэр ары. Мыр бэрэ IэпыIэгъу къытфэхъухэрэм ащыщ. Джащ фэдэу нэмыкI бизнесменхэми яшIуагъэ къытагъэкIы, — къыIуагъ ветеранхэм я Урысые общественнэ организацие и Адыгэ республикэ къутамэу «Боевое братство» зыфиIорэм ипащэу Алексей Харитоновым.

Компаниеу «Прораб» зыфиIорэм ипащэу Валерий Чуб къызэриIуагъэмкIэ, хэушъхьафыкIыгъэ дзэ операциер зы­рагъэжьэгъэ мэзэе мазэм къы­щыублагъэу тидзэхэм шъуа­шэкIэ, гъомылапхъэкIэ, газ ба­ллонхэмкIэ, хьакухэмкIэ, нэмыкI Iэмэ-псымэхэу ящыкIа­гъэхэмкIэ IэпыIэгъу афэхъух. Джы Адыгеим имобилизованнэ дзэкIолIхэм ящыкIагъэу къа­Iуагъэхэр арагъэгъотыным фэшI «Прораб» зыфиIорэ тучан зэ­хэтхэм ялIыкIохэм шIушIэ IэпыIэгъур къаугъоигъ.

Iэшъынэ Сусан.