ЦIыфым IофшIэгъэ илъэсэу иIэр зыщыгъэнэфэгъэ тхылъыр (трудовая книжка) электроннэ шIыкIэм тетэу гъэпсыгъэщтымэ, хьауми зытетым тетэу къэнэжьыщтымэ ежь къыхихын фит. Адыгеим щыпсэоу «трудовой книжкэр» электроннэ шIыкIэм тетыныр къыхэзыхыгъэр нэбгырэ мин 18-м ехъу. Ахэм ащыщэу нэбгырэ 6220-р мы илъэсыр ары ащ зытехьажьыгъэр.

Электроннэ шIыкIэм уте­хьажьыныр егъэзыгъэу щытэп, шъхьадж зэрэшIоигъу. ЦIыфым «итрудовой книжкэ» нахьыпэрэм тетэу къыгъэнэжьыгъэ­ми, нэужым ар зэблихъужьын фит. Лъэхъаным къыздихьыгъэ шIыкIакIэм шIуагъэу хэлъхэм анахь шъхьаIэхэм ащыщ цIыфыр зыщыфаем ащ итхагъэм еп­лъын, хэукъоныгъэ горэ фэхъу­гъэмэ аригъэгъэтэрэзыжьын амал зэриIэр. Ащ нэмыкIэу электроннэу шIыгъэ «трудовой книжкэр» зыгъэфедэрэм пэIудзыгъэ шIыкIэм тетэу IофшIапIэм Iухьан ылъэкIыщт. Мыщ фэдэ тхылъым адрэ тызэса­гъэм фэдэу, цIыфыр IофшIапIэу зыIутыри, ащ зыщыIухьагъэри, иIэнатIи, икваллификации, къы­IукIыжьыгъэмэ, къызщыIу­кIы­жьыгъэри, зэрэIутыгъэр зыфэдизыри итхагъэх.

IофшIэгъэ илъэсхэр зыфэдизхэр, нэмыкIэу ащ епхыгъэу цIыфым ищыкIагъэр ПенсиехэмкIэ фондым иинтернет нэкIубгъо щыгъэпсыгъэ «унэе кабинетым» е къэралыгъо фэIо-фашIэхэм япортал щызэригъэшIэнхэ ылъэ­кIыщт. «Трудовой книжкэр» тхьапэм тетымэ, IофшIапIэр къезытыгъэм екIолIэн фае, ПенсиехэмкIэ фондым е МФЦ-м зафигъазэми хъущт.

IофшIапIэм Iутэу «трудовой книжкэр» зыгъэпсыгъахэм ежь шIоигъо хъумэ электроннэу ар ышIыжьынэу 2020-рэ илъэсым ищылэ мазэ и 1-м къыщыублагъэу амал иIэ хъугъэ.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.